Mga tawo sa BRT project giibanan

CEBU, Philippines — Hayan malangan ang implementasyon sa Cebu Bus Rapid Transit human 13 ka empleyado sa Project Implementation Unit (PIU) ang wala na gi-renew sa serbisyo.

Giklaro hinoon ni CBRT-PIU head, Atty. Rafael Christopher Yap, nga wala’y kamatuoran ang taho nga gibungkag ang unit ug nahitabo lang nga ang Department of Transportation nipahibawo nga dunay reorganization nga himoon hinungdan nga 13 ka empleyado ang wala na gi-renew gikan sa 25 ka empleyado.

Sagad nila na-assign sa land acquisition component ug matud ni Yap nga maglisud sila og apas sa timeline sa implementasyon niini.

Wala’y gihatag nga rason ang DOTr nganong dunay reorganization ug igo lang nipahibawo sa epekto niini.

Nag-finalize na karon ang PIU sa mga dokumento alang sa procurement diin nagpadala na sila og offer letter, nangonsulta sa mga apektado sa proyekto ug uban pa.

Wala na nihatag pa og dugang komento si Yap sa pangutana nga basin alibi lang kini sa DOTr aron hingpit nga ikanselar ang proyekto.

Hinoon anaa gihapon sa Build Build Build website ang proyekto diin pasabot niini nga usa kini sa flagship infrastructure development sa Duterte administration.

Samtang  nagpadala og suwat si Yap kang Mayor Tomas Osmeña nga nagpahibawo nga siya nadawat isip candidate sa Project for Human Resource Development Scholarship sa Japanese Grant Aid (JDS) 2018-2019 diin mapaubos siya og usa ka tuig nga Master’s Degree on Public Policy sa National Graduate Institute for Policy Studies sa Tokyo, Japan ubos sa scholarship sa JDS.

Subay niini si Yap nihangyo nga ang iyang detail order sa DOTr i-revoke ug mo-report siya balik sa iyang home office nga mao ang City Legal Office aron ma-process ang mga gikinahanglan nga mga clearances alang sa iyang pagtuon.

Giklaro ni Yap nga ang mahitabo sa PIU wala’y kalabutan sa iyang pagtuon gawas sa nasud tungod kay sa niaging tuig pa siya nagsugod og apply niini ug ang reorganization niadto lang Marso 23. (GMR) (BANAT NEWS)