Tulo natabunan patay

CEBU, Philippines — Tulo ang patay human midahili ang yuta samtang magpabarug unta kini sa haligi sa nagpadayon nga construction sa usa ka poultry sa may Sitio Candiis Barangay Sibago, Lungsod sa Pinamungajan, hapon sa adlaw nga Miyerkules.

Ang nakalas naila nga sila si Feliciano Media, 56, kontraktor sa Bird Steel Farm, taga Lower Sampaguita, Mandaue City ug Renerio Cabilin Jr., 40, taga barangay Sibago ug ang usa ka Denis Artis.

Matud pa ni Police Officer 1 Nathaniel Mansueto, Desk Officer sa Pinamungajan Police Station gitrabaho nilang Cabilin ug Artis ang haligi, apan kalit lang nidahili ang yuta ngadto kanila hinungdan nga sila natabunan sa bangag diin didto sila nagbarog.

Dugang pa ni Mansueto sa dihang nakita ni Media ang nahitabo sa iyang duha ka sakop dali kining nitabang apan natabunan kini og apil sa nidahili nga yuta, silang tulo ang nakalas.

Nagtinabangay ang mga trabahante pagkuha sa tulo gamit ang backhoe ug dali nga gidala sa tambalanan sa Toledo City apan gideklarar sila nga wala nay kinabuhi.

Sumala pa ni Mansueto humok ang yuta nga midahili hinungdan mopahigayon pa sila og imbestigasyon.

Samtang ang Department of Labor and Employment mipadala na sa ilang inspector sa site aron mopahigayon og    pakisusi.

Matud pa ni Luchel Senarlo-Taniza, Labor Information Officer III mohimo og occupational safety and health inspection ug anha nila basehan kon magpagawas og stoppage order ug himuon dayon ang mandatory conference.

Sa pikas bahin, nipahigayon og risk assessment ang team sa Provincial Disaster Risk Reduction and Management Office (PDRRMO) sa maong hitabo.

Matud ni Ike Cabarles ang local disaster officer sa Pinamungajan nga nahitabo ang maong insidente samtang ga- welding ang duha ka trabahante sa gihimo nga poultry.

"Ang duha ka welders nagtrabaho, nakabantay sila nga naglihok ang yuta, taud-taod natabunan sila unya ang usa nitabang unta apan natabunan pud siya og apil kay ang structure natumba man," matud ni Cabarles.

Si Julius Regner ang tigpamaba sa PDRRMO nagkanayon nga ang assessment sa ilang team maoy basehan sa intervention nga himoon sa PDRRMO.

Usa sa gitan-aw karon sa PDRRMO ang pag-train o seminar sa mga kontraktor sa mga "safety measures" alang sa ilang mga trabahante samtang nagtrabaho. (IBM) (BANAT NEWS)