P4 milyon marijuana gipanglarot

CEBU, Philippines — Mikabat ngadto sa kapin P4 milyones ang balor sa gipanglarot nga mga tinanom nga marijuana diha sa Sitio Himatugan, Barangay Gen. Climaco, Dakbayan sa Toledo kagahapon sa kaadlawon.

Ang direktor sa Cebu Provincial Police Office (CPPO) Senior Superintendent Edgar Alan Okubo mibutyag nga usa ka giilang Juanito Ocareza alyas “Nito”, residente sa maong dapit ang giingong cultivator sa maong mga marijuana.

Apan giingong nakaikyas kini tungod kay nakabantay nga nagpaingon  sa lugar ang mga sakop sa Provincial Intelligence Branch, 703rd Mobile Force Company, CPPO 2nd Provincial Mobile Force Company (PMFC) ug ahensiya sa Philippine Drug Enforcement Agency (PDEA)-7.

Giingong 12,400 ka punoan sa marijuana nga “full grown” ang gipanglarot sa maong grupo sa kapolisan ug PDEA gikan diha sa lugar.

Matud ni Okubo nga ikaduha na karon nga higayon nga si Ocareza gironda sa kapolisan sa susamang kalapasan ug kanunay usab kining makaikyas.

 Apan bisan og wala masikop ang suspetsado pasakaan gihapon siya sa kapolisan og kasong kalapasan sa Article 2 Section 16 sa Akta Republika 9165 Article nga mao ang pagdili og pagpananom og marijuana. (BDB) (BANAT NEWS)