Oratio Imperata ipagawas sa Simbahan

CEBU, Philippines —  Ang chairman sa Commission on Worship sa Archdiocese of Cebu Fr. Glenn Therese Guanzon miingon nga kinahanglang aduna nay ipagawas nga pag-ampo o oratio imperata ang Simbahan aron mahunong na kining sagunson nga mga pagpamatay.

Matud pa ni Guanzon sa iyang personal nga panahom kinahanglanon na g’yud ang hiniusa nga pag-ampo sa katawhan tungod kay makapabalaka kini ug makaguba usab sa kalinaw.

Sumala pa ni Guanzon kung suknaon siya sa Arsobispo kung kinahanglan ba ang oratio imperata andam siya morekomendar niini.

Apan siya magpaabot sa mando ug sugo sa obispo aron sa paghimo sa draft niini. Nagtuo si Guanzon nga mas paminawon sa Kahitas-an ang pag-ampo kon daghan ang mangayo niini.

Si Archbishop Jose Palma sa iyang bahin nibutyag nga magtigom sila sa sunod semana kauban ang mga board of consultors nga gilangkoban sa mga episcopal vicars ug mga pinili nga mga kaparian aron hisgotan ang maong tinguha.

Gitug-an ni Palma nga mopahimo na usab siya og draft alang sa oratio imperata aron mahunong na kining sunod-sunod nga pagpatay. (IBM) (BANATNEWS)