Gikan sa korte gibanhigan patay

CEBU, Philippines — Gibanhigan patay didto sa barangay Poblacion, lungsod sa Alcantara ang usa ka 47-anyos nga lalaki samtang nagsakay sa iyang motorsiklo uban sa iyang asawa kinsa gikan pa nang-attend og hearing sa iyang kaso didto sa Barili niadtong Lunes sa hapon.

Ang nakalas giila sa Barili Police Station nga si Edgar Gador samtang ang naluwas nga asawa niini giila nga si Merlina Gador nagpuyo sa barangay Tomonoy, Moalboal.

Sigun pa sa inisyal nga imbestigasyon sa imbestigador sa maong kaso nga si SPO3 Christopher Bani, gikan pa sa Regional Trial Court Branch 60 sa Barili ang duha alang sa hearing sa kasong possession of firearms ni Edgar.

Apan samtang padung na pauli, adunay misunod kanilang duha ka lalaki nga nag-angkasay usab sa usa ka motor ug mitupad kanila dayong pusil sa biktima duha ka higayon sa ulo.

Natumba ang magtiayon nga nakaingon usab sa bukol sa agtang ug bali sa tudlo sa ginang. Gituohang hanas sa armas ang nipatay sa biktima.

Ang hepe sa Moalboal Police Station nga si Police Senior Inspector Jose Rovic Villarin mibutyag nga ang kaso ni Edgar may labot kini sa pagpanion niini og armas ngadto sa usa ka tiguwang niadtong miaging tuig.

Matud pa nga wala kini matanggong sanglit nakapyansa kini. Dugang gibutyag ni Villarin nga niadtong 2006, nakapatay og usa ka negosyante si Edgar apan giingong nahilom na lang kini sa pagdagan sa panahon.

Nunot niini, gisubay sa kapolisan kun aduna bay kalabutan ang iyang mga kaso kaniadto sa gidangatan niya. (BANAT NEWS)