85 sakyanan ug motor i–release na
CEBU, Philippines — Gibanabanang 85 ka mga sakyanan nga nadakpan tungod sa counterflowing ang i-release sa Cebu City Transportation Office (CCTO) karong semanaha human gi-impound sud sa 30 ka adlaw tungod sa paglapas sa executive order 034.
Kahinumdoman nga niadtong Pebrero 2, si Mayor Tomas Osmeña mipirma sa Executive Order (EO) 034 nga nagmando nga ipa-impound ang mga sakyanan nga masakpang nag-counter-flow.
“The first batch of impounded vehicles are going to be released this week,” matud pa sa post sa Facebook official page ni Osmeña.
Apan si Osmeña mipasidaan nga kon usbon pa gihapon kini sa drayber sa maong mga sakyanan sa ikaduha nga higayon doblehon ang mga adlaw sa pag-impound niini, o 60 na ka adlaw.
Ang CCTO operations chief Francisco Ouano nagkanayon nga Pebrero 5 nagsugod ang implementasyon sa EO 034 sa mga sakop sa Mobile Patrol Group ug Task Force Alpha.
Ang i-release naglakip sa 75 ka motorsiklo, tulo ka wa marehistro o way lisensya ang drayber, usa ka public utility jeepney, usa ka taxi unit, ug lima ka pribadong sakyanan.
Sa dili pa ihatag ang ilang mga sakyanan, si Ouano nagkanayon nga kinahanglan pa mobayad og P500 isip multa.
Gawas sa maong multa pabayaron pa sila kaniadto og storage fees apan gi-waive na kini ni Osmeña kay matud pa niya dili multa ang giapas sa siyudad kondili ang disiplina sa mga motorista.
“Dili ra sila pabayron sa storage fee,” matud niya. Apan siya mipasidaan nga basin sa sunod nga madakpan sila pabayran na kanila ang storage fee.
Ang EO 034 gipagawas aron mamenusan ang mga aksidente sa kadalanan ug madisiplina ang mga motorista. (BANAT NEWS)
- Latest
