Family Day sa mga sinagop emosyonal

CEBU, Philippines — Emosyonal ang Family Day kagahapong adlawa sa pagtapos sa Adoption Consciousness Week nga gipasiugdahan sa Department of Social Welfare and Development sa J Centre Mall sa Siyudad sa Mandaue.

Wala kapugong si Concepcion Solera, social welfare officer sa DSWD-7, sa pagpatulo sa iyang mga luha.

“Touching lang gyud kaayo. Dili ko makatuo nga sa pagsulod nako sa hall ingon ani kadaku ang surprise nga imong maabtan. Overwhelming lang gyud kaayo. Kuwang ra gyud ang thank you sa inyong gipakita nga kaayo,” matud niya ngadto sa magtiayong Nena ug Jose “Dodong” Gullas, ang chairman sa The Freeman ug Banat News.

Ang magtiayon nga proud adoptive parents maoy major sponsor sa kalihukan ug mga kalingawan sa kabataan.

Ang DSWD-7 giabagan sa Central Visayas Adoptive Parents Association (CVAPA) diin sakop ang magtiayong Gullas.

Si CVAPA president Kaking Sy niingon nga ang nangaging selebrasyon simple lang hangtud niabot ang magtiayong Gullas.

Nahimamat ni Nena ug Dodong ang CVAPA human sila nakahukom nga mosagop og bata.

Si Nena nahimo sab nga emosyonal samtang nagpasalamat sa mga tawo nga nitabang sa kalihukan diin sa iyang tupad mao si Dodong ug ilang sinagop nga batang babaye nga gitawag ni Dodong ug “the apple of my eye.”

Nangapod-apod sab ang magtiayon og tag P10,000 sa 11 ka child-caring agencies sa rehiyon samtang ang laing tulo nakadawat og lain nga regalo nga mao usab ang ilang gipangayo.

Nakahilak sa kalipay ang ubang kadagkuan ug representante sa mga child-caring agencies sa nadawat nga surprisa.

Si Dodong, executive vice president sa University of the Visayas, nipahibawo sab nga mopili siya og 13 ka scholars gikan sa mga sentro nga malibre sa pag-eskwela sunod school year.

Si Clavel Saycon, pangulo sa DSWD-7 Adoption Resource and Referral Section, nidason nga nahimong instrumento ang magtiayon ug ang ubang adoptive parents nga makadani sa uban nga mosagop sab og bata ug ipaagi kini sa legal nga proseso. (BANAT NEWS)