Natulog natumbahan og lubi

CEBU, Philippines — Bisan og dili kaayo kusog ang bagyong Basyang nga mitadlas sa Sugbo kaniadtong Martes sa gabii, apan nakakalas gayud kini og kinabuhi dihang usa ka payag natumbahan og lubi didto sa Barangay Madridejos, Alegria.

Matud pa nga si Jenas Demecillo Allonis, 57, natulog na diha nga kalit lang natumbahan sa punoan sa lubi ang iyang payag ug nakaangkon og grabeng bun-og sa kalawasan.

Si Gobernador Hilario Davide III misaad nga mopahatag og hinabang ngadto sa pamilya sa biktima. Gikataho nga miabot og 1,872 ka tawo ang gipabakwit tungod sa Basyang.

Gikan kini sa Alegria, Ginatilan, Malabuyoc, Sibonga, Argao, Sogod, Aloguinsan, Ronda, Daan Bantayan, Samboan, Boljoon ug Talisay City. May 1,033 usab ka pasahero ang na-stranded sa mga pantalan sa lalawigan.

Adunay pagdahili sa yuta nga nahitabo sa Barangay Ylaya, San Fernando ug sa Barangay Pakigne, Minglanilla. Nasuta hinoon sa pagsubay sa Banat News sa kalungsoran sa habagatang Sugbo nga wala ra kaayo’y dagkong kadaot nga gibilin ang bagyong Basyang. (BANAT NEWS)

Wala Makapanagat

Samtang gatusan ka mananagat ang wala makapangisda sa Talisay City tungod sa bagyong Basyang ug sila gipanghatagan og hinabang nga bugas ni Mayor Eduardo Gullas kagahapon buntag.

Matud ni Gullas nga ingon niini ang iyang himoon kon adunay katalagman. Unang gisuroy ni Gullas mao ang Barangay Tanke nga aduna'y mga 800 ka mananagat ang nakapahimus sa hinabang. Giadto usab ni Gullas ang Barangay Cansojong ug Barangay Poblacion.

Si Felipa Solana, pangulo sa Talisay City Social Welfare and Development (CSWD) nagkanayon nga naa pa sila'y hatagan og hinabang karong adlawa, apil na ang taga Barangay San Roque.

Matud ni Solana nga ang ilang gihatagan mao kadtong mga mananagat nga narehistro sa siyudad ug sakop gyud sa organisasyon sa mga mangingisda.

Nagpaklase Gyud

Samtang gideklarar nga wala’y klase sa tibuok Sugbo kagahapong adlaw nga gipahibalo sa gobernador ug mga mayor, wala malipay si Mayor Tomas Osmeña kay dunay mga tagdumala og pribadong tunghaan nga wala motuman sa kamandoan.

Wala na hinoon ibutyag sa mayor kon unsa kini nga mga tunghaan apan matud niya nga kon nahitabo pa nga nag-uwan ug nagbaha, unya nameligro ang kinabuhi sa mga tinun-an, sigurado nga mag-atubang og mga kasong kriminal ang mga masinupakon.

Matud sa mayor nga ang iyang kamandoan pagpasuspenso sa klase kagahapon gibase tungod sa report gikan sa National Disaster Coordination Council nga adunay kusog nga uwan ug baha sa Sugbo. Gabriel C. Bonjoc, Le Phyllis F. Antojado, Decemay Padilla (RUB) (BANAT NEWS)