Sex initiation sa gangs Rowena D.Capistrano ug Camille Pateres

CEBU, Philippines — Naalarma ang kapitan sa barangay Pajo tungod sa report nga adunay mga sakop sa gang diha sa ilang dapit nga ang initiation rites pagdawat og miyembro mao ang pakig-sex sa mga sakop niini.

Nabalaka si Kapitan Jonard “Ahong” Chan nga nahinabi sa Banat News kay aduna nay pipila ka mga minor de edad nga nidangop sa iyang buhatan kay natakboyan og Sexually Transmitted Disease (STDs).

Sumala pa ni Chan nakuha nila ang maong mga sakit gikan sa mga gang members nga mirekrut kanila. Matud pa nga aron sila dawaton sa grupo, papilion ang rekrut kon unsang paagiha nila gustong makasulod, kon “masakit” ba o “masarap” nga pamaagi.

Gitug-an ni Chan, kung mopili ang rekrut sa masakit makatilaw kini sila og sagpa o bunal gikan sa mga miyembro sa gang apan kung sa masarap makighilawas sila sa mga miyembro sa grupo, ayha pa sila dawaton.

Sumala pa sa kapitan nasayran nila ang maong mga binuang nga kalihokan aning mga menor de edad tungod pagpatuman nila og curfew diin adunay mga kabataang ilang nahipos ug ilang nadiskubrehan nga dili sila tanan residente sa ilang barangay kondili adunay taga ubang siyudad sa Metro Cebu.

Ang mga minor de edad nga ilang na-rescue nag-edad pa lang og 13 ngadto sa 17-anyos ug sila natakboyan na og ‘sira’ o STDs.  Ang uban kanila giingong nagdala-dala na niining maong sakit sud na sa unom ngadto na sa walo ka bulan ug gikabalak-an nga nakatakod na kini sa uban.

Ang gikabalak-an og maayo sa kapitan, wala gyud modangop og doktor kining mga bataa aron matambalan ug sila anaa pa gihapon sa kadalanan.

Nakig-alayon si Chan sa Department of Health, City Health ug sa kapulisan ilabi na sa kagamhanan sa siyudad aron mahatagan og kasulbaran ang maong problema.

Matud niya nga pipila sa ilang na-rescue ang ilaha nang gipatambalan ug plano niyang mahatagan sila og skills training aron sila makapanarbaho ug dili na maglisod kay matud niya kini maoy kasagarang ugat sa mga problema.

Sa pikas bahin, gimando ni Cebu Provincial Police Office Provincial Director Senior Supt. Edgar Alan Okubo ang pag-monitor sa mga fraternities nga magpahigayon og hazing.

Niadto lang nakalabay nga Martes, 16 ka mga minor de edad ang naluwas sa kapolisan sa Medellin human sila naaktohang gipaubos sa initiation pinaagi sa hazing sa grupo nga Alpha Kappa Rho diha sa barangay Daanlungsod.

"The police is working on identifying the frat groups sa province to have a dialogue with them, kahit sa stations lang. And remind them to be aware na-hazing is a violation of the law," si Okubo miingon.

Gawas sa drug awareness, ilakip na sa mga seminar sa kapolisan ngadto sa mga tunghaan ang kabahin sa fraternity ug bahin sa hazing.

Gitahasan sab niya si Senior Insp. Maria Teresa Gutierrez, hepe sa Medellin Police Station nga awhagon ang mga ginikanan sa maong mga batan-on pagpasaka og kaso batok sa tulo nga nag-organisar sa maong hazing initiation. (BANAT NEWS)