Anti-hazing campaign gilusad sa Toledo
Ang DepEd Toledo ug Toledo City Police Station maoy nagtambayayong aron mapatuman ang maong awareness campaign. File
CEBU, Philippines — Sobra singko mil ka mga estudyante ug mga kabataan ang gipaubos sa Fraternity and Anti-Hazing Awareness Program sa dakbayan sa Toledo.
Ang maong mga tinun-an gikan sa nagkadaiyang mga junior ug senior high school nga mga estudyante sa 12 ka mga high schools ubos sa Department of Education Toledo City Division.
Ang DepEd Toledo ug Toledo City Police Station maoy nagtambayayong aron mapatuman ang maong awareness campaign.
Matud ni Jeffrey Lacson, labaw sa Education Program ug Child Protection Program sa DepEd Toledo Division pinasubay kini sa palisiya sa DepEd nga paghimo gyud sa tanang mga eskuylahan nga Child Friendly School.
Matud niya aduna silay mga nadawat nga report nga adunay mga estudyante nga nanulod og grupo nga gipaagi og hazing.
Sumala pa niya ang DepEd “zero tolerance” gyud kon pagpangabuso sa kabataan ang hisgutan.
Samtang si Darwin Bravante, guidance counselor sa DepEd Toledo Division miingon nga ang DepEd Order 7 nagdili gyud niining mga “hazing” sa bisan unsang organisasyon sa mga estudyante nga menor de edad.
Si Senior Police Officer 1 Dante Hilo, Police Community Relation Officer sa Toledo City police kinsa mao ang speaker sa awareness campaign nagkanayon nga ilang gituyo ang maong kampanya human sa nahitabo nga hazing sa usa ka estudyante sa pampublikong tunghaan sa Toledo kaniadto.
Usa sa narekrut ang namatay ug adunay duha ang nakaangkon og grabeng bun-og sa lawas tungod sa pagbunal nga gitawag og hazing.
Matud ni Hilo nga gusto niya nga masayod ang mga menor de edad bahin sa risgo sa kinabuhi kon sila mabiktima og hazing sa mga dautang organisasyon.
Giklaro hinuon niya nga dili bawal ang mga fraternities ug sororities apan bawal magrekrut og mga bata.
Plano usab sa Toledo City Police Station nga makig-alayon sa mga pribadong tunghaan sa Toledo sa pagpatuman og anti-hazing campaign. (BANAT NEWS)
- Latest
