Gimilagrohan ni Sto. Niño

CEBU, Philippines — Nagkataas ang katuigan ug nagkadaghan sab ang mga debotos sa Balaang Bata nga si Sr. Sto. Niño. Daghan kanato ang nakadawat og milagro gikan Kaniya ug mao kini ang nagpalig-on sa atong pagtuo ngadto sa atong Ginoo. Ania ang mga sugilanon nga madugang sa kutay sa makatandog nga kasinatian sa mga debotos gikan sa gimahal natong tanan nga si Sr. Sto. Niño.

Si Ronald Bitor, 46 anyos, nagpuyo karon sa Consolacion, Cebu. Lumad nga taga Palompon, Leyte si Ronald, minyo ug adunay anak. Sa nag- edad pa og singko anyos ang kamagwangan nga anak niini nga si Addie Bitor,(16 anyos na karon), nag-antos kini sa sakit sa iyahang kidney. Magsakit matod pa ang dughan ni Ronald nga magsud-ong sa iyahang anak nga bata pa lang nag-antos.

“Maluoy ko magtan-aw sa bata, nangihi na gud siya og dugo,”paambit pa niini.

Gikan sa Leyte, napugos sila og anhi sa Sugbo aron lang mapatambalan ang anak sa usa  ka pribadong ospital. Gibutyag ni Ronald nga magbalik-balik sila dinhi sa Sugbo kay gipailawom man si Addie og treatment. Lima ka tuig ang kadugayon sa maong treatment ug kon wala gihapoy alibyo nga makita human sa lima ka tuig kinahanglan na kining ilisan og kidney.

Sa sige og balik sa ospital, wala na gyud kaantos ang iyahang anak nga si Addie ug nidagan na kini atol sa gipahigayon nga pagtambal ngadto kaniya.

“Paabuno na mi’g dugo unya modagan naman siya kay dili na gyud kaantos ang bata. Pino kaayo ang ugat niya ug maglisod og tira sa dagom.”

“Niingon ko niya nga, Dong, either ako or ikaw, mamatay gyud ta. Instead nga mauna mi nimo kay maguwang mi nimo, kung dili ka mo-cooperate kay mamatay gyud ka,”pasabot niya ngadto sa iyang anak.

Apan nakalitan si Ronald sa tubag sa iyahang anak ug nasabtan niya nga andam na ang bata sa iyahang kamatayon.

“Kanus-a man ko mamatay?”tubag pa ni Addie ngadto sa iyahang amahan.

Maong na kahukom na lang sila nga mouli na lang ug dili na ipadayon ang pag-abuno og dugo sa iyahang anak. Apan sa wala pa nipauli, nihapit una sila sa Basilica Minore Del Sto. Niño.  Kanunay silang mohapit didto matag anhi nila sa Sugbo.

Sa Sto. Niño, nakakita ang bata og tiguwang nga nagsinulog atubangan sa simbahan ug nangutana kini sa iyahang amahan kon unsa kadtong gibuhat sa tiguwang.

 “Ug nisayaw ang bata heartily, five years old gud na but naka-feel gyud siya sa pain sa iyahang sakit. Nisayaw siya from the door to the altar. Nisunod siya sa tiguwang. Naghilak gyud me nagsunod niya sa luyo.”

Human adto gidala pud niya ang anak didto sa Birhen sa Regla sa Opon. Huna-huna niya nga nanginahanglan sab sila og tabang gikan sa inahan. Gibuhat sa bata ang susamang sayaw atubangan sa Milagrosang Inahan.

 “Ako siyang gipasagdan as a child, hilig man siya og football ako lang siya gipasagdan.”

Sukad nga nagsige og duwa ang bata wala na kini nagsige og mulo sa iyahang sakit bisan ang hubak niini nawala.

Wala na sila nibalik sa doctor ug hangtod nga nakalimot siya nga lima na diay ka tuig ang nilabay human nagpatambal sila. Nakahinumdom siya nga gitambagan sila sa doktor kaniadto nga gikinahanglan na magpailis og kidney si Addie human sa lima ka tuig. Gibati na og kabalaka si Ronald ilabi na nga nadawat si Addie sa tryout niini aron moduwa sa national competition sa football. Busa niadto gyud sila sa doktor aron magpakisayod dili ba makadaot sa bata ang pagduwa didto sa national.

Gitan-aw sa doktor si Addie, ug nakita niini ang dakong kausaban sa panglawas sa bata, himsog na kaayo kini.

“Para nako dako gyud to nga milagro gikan ni Sr. Sto. Niño ug sa Mahal nga Birhen sa Regla,” butyag pa ni Ronald.

Giasoy sab ni Ronald nga ang milagro nga nadawat sa bata kay niapekto gyud ngadto sa bata sanglit prayerful man kaayo kini karon ug buot pa kining magpari puhon.

Laing deboto nga nakadawat og dakong milagro gikan sa Balaang Bata mao si Ma. Antonette Ebo, 24 anyos, nagpuyo sa Lo-oc, Lapu-Lapu City.

Niadtong Disyembre 2016, nahibaw-an ni Antonette nga adunay cyst ang duha niya ka ovaries ug naguol siya human sa maong kasayuran kay imposible naman nga mabuntis pa siya tungod sa maong komplikasyon.

“Depressed ko sa akong nahibaw-an, ganahan pa man unta mi sa akong partner magka-baby bisag usa lang,”pahungaw pa niya.

Busa sa niaging tuig, gipaningkamotan gyud niya nga makaapil sa nobenaryo sa kapistahan ni Sr. Sto. Niño bisan pa man nga kapoy na kaayo iyahang lawas gikan sa trabaho. Wala’y laing gipangayo si Antonette kundili mao nga hatagan sila sa iyahang bana og anak.

Gawas sa pag-ampo ngadto kang Senyor, naningkamot sab siya og inom og mga vitamins ug pahilot kay desperada gyud siya nga mabuntis, apan duha ka buwan na ang nilabay kay wala gihapoy kalamboan.

“Niingon sila nga milagro na lang ang makapabuntis nako tungod sa akong sakit. Pero wala ko nawad-an og faith ni Sto. Niño nga iya kong hatagan. Nagpadayon ko’g inom og vitamins.”

Hangtod nga niadtong Hunyo miaging tuig, nakabatyag siya og kausaban sa iyahang panglawas. Kanunay siyang magduka, sakit ang pus-on, wala’y gana mokaon ug perming mosuka. Nagtuo siya nga gihilantan ra siya. Gisultian niya ang iyahang suod nga higala sa iyahang kondisyon ug gipugos siya niini nga magpa-pregnancy test kay hayan buntis siya.

“At first dili ko kay di ko ganahan nga maguol na sad na negative napud ang results pero ang akong friend jud ang sige og push nako nga mo-try.”Nipalit siya og pregnancy test kit. “After one hour pa nako before gitan-aw ang result, ug pagtan-aw nako kay duha ka linya meaning, positive. So na-shock ko sa resulta ug wala ko nakatuo,”saysay pa niya.

Kay nagpanagana man siya og tuo, gisubli niya ang test og positive gyud ang resulta. Busa nidalikyat dayon og pakonsulta sa doctor si Antonette ug didto giingnan siya niini nga unom ka semana na siyang buntis.

Nibalik siya sa doktor sa paglabay sa walo ka semana alang sa ultrasound. Nakahilak si Antonette human nakadungog sa pitik sa kasingkasing sa iyahang gisabak ug gihimaya niya si Sto. Niño sa dakong milagro nga iyahang nadawat.

Dinhi na niya gipahibalo iyahang bana sa maayong balita ug nagsige sila og balik sa basilica aron magpasalamat sa Balaang Bata.

“Maka ingon gyud ko nga milagro kay dili tanan mabuntis sa naay ingon ani nga sakit maong dako gyud ko’g pasalamat ni Sto. Niño,” butyag pa niya.

Ug tungod niini, nisaad si Antonette ngadto Kaniya nga mamahimo siyang responsabli nga inahan sa umaabot niyang anak.

“Promise nako nimo nga I'll be a good mother sa akong baby puhon. All I ask karong panahona unta normal lang ug healthy si baby inig ka gawas. Viva Sr. Sto. Niño!”