Mandaue nihinabang sa Marawi
CEBU, Philippines — Nihatag og P100,000 nga hinabang ang kagamhanan sa Dakbayan sa Mandaue ngadto sa Marawi City nga nagusbat tungod sa panag-engkwentro tali sa kasundalohan ug teroristang grupo sa Maute.
Si Bise Mayor Carlo Fortuna ang nihatud sa maong kantidad kuyog sa iyang mga staff sa niaging adlaw diin ila gyud nakita ang pagkagusbat sa lugar ug kinahanglan gyud tabangan.
“The war zone was a no man’s land and it was like a ghost town. “It’s sad and dismal,” matud ni Fortuna.
Dugang pa niya nga wala hinuon sila naglisud sa pagbiyahe tungod kay ang kanhi Philippine Councilors League chairman sa Lanao del Sur nga si Lacs Panantoan ang nagdala kanila gikan sa Cagayan de Oro City ngadto sa Marawi City ug sa pagbalik.
Ang tseke gitugyan ni Fortuna ngadto kang Marawi City Mayor Majul Gandamra. (Romeo T. Limpangog/GMR)
Survey sa ‘depression road’ sa UN Ave. gisugdan na
Gipahigayon na sa Department of Public Works and Highways ang parcelliary survey alang sa ugmaron nga depression road sa may UN Avenue ug dalan Plaridel sa Dakbayan sa Mandaue.
Ang maong survey gipaabot nga molanat og unom ngadto sa walo ka buwan sumala sa tigpamaba sa DPWH-7 nga si Marie Nillama.
Ang survey nasugdan na karong buwana ug human niini gipaabot nga masugdan ang 910 ka adlaw nga pagtrabaho sa maong proyekto nga kantidad og P771 milyones.
Matud ni Nillama nga taga Tacloban City ang contractor sa maong proyekto.
Ang depression road gipaabot nga masugdan karong tuiga matud ni Engr. Faustino Dela Cruz Jr., ang pangulo sa maintenance department sa DPWH-7, atol sa Mactan-Cebu Bridge Management Board (MCBMB) meeting kagahapon nga gipangulohan ni Gobernador Hilario Davide III.
Kini gipaabot nga sulbad sa trapiko sa may Marcelo Fernan Bridge sa Dakbayan sa Mandaue.
Matud ni Dela Cruz nga moabot sa 600 meters ang gitas-on sa dalan diin upat ka lanes ang underpass ug tag duha ka lanes sa isig ka kilid alang sa road widening.
“Hati-on nimo na siya from the junction most likely mao na siya. 300 meters from the intersection of UN Avenue and Plaridel. 300 meters pasaka and 300 meters pud paatras,” matud ni Dela Cruz. (BANAT NEWS)
- Latest
