Tulo ka construction workers nangatagak sa 2nd floor
CEBU, Philippines — Tulo ka mga construction worker ang nalandig sa tambalanan human aksidenteng nangahulog sa gitrabahong mall diha sa Barangay Pahina Central, Dakbayan sa Sugbo kagahapon sa hapon.
Ang mga nangaangol mao sila si Ricky Catubig, 26, residente sa Barangay Mabolo, Dakbayan sa Sugbo, Noel Montaño ,32, lumad nga taga Madredijos sa Bantayan ug si Apolonio Pardillo ,22, taga Dakbayan sa Toledo.
Sigun pa sa inisyal nga imbestigasyon sa imbestigador sa maong kaso nga si SPO1 Winston Ybañez sa Homicide Section sa Cebu City Police Office nga nagpatong sa ilang giayo nga haligi sa ikaduhang andana ang tulo kauban sa laing lima nila ka mga kauban.
Si Ybañez miingon nga nikalit og kahugmak ang gitungtongan sa tulo. Matud pa nga wala magsuot og body harness ang tulo hinungdan nga nangahulog gyud sila sa ubos samtang swerteng nakakapyot ang duha.
Dali nga gidala sa tambalanan ang tulo kinsa nakaangkon og mga kadaot sa ilang kalawasan. Matud pang Ybañez 12 metros ang gihabugon sa gitagakan sa tulo.
Base sa international standards sa Occupational Safety and Health Administration (OSHA), kon ang trabahoon (construction) moabot na gani og unom ka tiil ang gihabugon kinahanglan nang magsuot og full body harness ug personal protective equipment ang trabahante tungod sa peligro nga matagak.
"Si Pardillo naay mga samad-samad. Si Montaño sakit kuno matul-id iyang kamot," si Ybañez miingon.
Laing nadiskobrehan sa maong imbestigasyon mao nga gawas sa walay mga personal protective equipment ang mga trabahante sama sa hard hat, boots ug uban pa, walay supervisor nga nag-monitor sa mga trabahante.
"Matod pa nila ang site engineer supervisor gibiyaan sila kay nag-outing. Walay nag-supervise kay kung naa pa siguro basin og mabadlong pa sila. Kadtong mga trabahante wala man bisa’g kadtong nagtrabaho walay mga helmets. Mga basic safety ba kay wala," si Ybañez midugang. (IBM) (BANATNEWS)
- Latest
