Metro Cebu nangandam sa rally

CEBU, Philippines — Dili momenus 15 ka Kaohsiung buses ang naka-estambay sa South Road Properties nga mopasakay kun dunay ma-stranded nga mga pasahero nunot na sa rally nga ipahigayon karong adlawa.

Gibutyag sa Operation’s Chief sa Cebu City Transportation Office (CCTO) Francisco Ouano nga nasabotan nila ni Cebu City Councilor Dave Tumulak, Chairman sa Committee on Public Order and Safety nga libre ang pagsakay sa mga bus.

“Just in case, naay gi-prepare ang siyudad nga buses. Pero dili man ingon ana ka grabe ang rally ugma, dili na siya maka-paralyze sa commuters,” asoy ni Ouano.

Pito ka mga mobile patrolcars ang gitahasan nga molibot sa siyudad aron pag-monitor sa sitwasyon sa trapiko.

Ang Pinagkaisang Samahan ng Tsuper at Operators Nationwide (PISTON) maoy mopahigayon og rally karong adlawa.

Tumong sa pagpahigayon og lihok-protesta aron ipadayag ang ilang pagsupak sa plano sa gobiyerno nga i-phase out ang Public Utility Jeepneys nga nag-edad 15 anyos pataas.

Si Tumulak sa iyang bahin nagtuo nga di makaparalisar sa transportasyon ang buhatong rally sa mga drayber.

Ang grupo mopahigayon og rally sa Land Transportation Franchising and Regulatory Board (LTFRB)-7 sa Jose Briones Street, North Reclamation Area, siyudad sa Sugbo.

“Wala tay preparations, ang PISTON wala man sila nanawagan og strike, rally lang adto sa LTFRB,” matud ni Tumulak.

Sa laing bahin, tungod kay kadaghanan sa mga sakop sa PISTON anha man magbiyahian sa Mandaue ug Lapu-Lapu City  giandam na usab nila ang mga sakyanan nga motabang sa paghakot sa mga pasaherong matanggong. -/IBM (BANAT NEWS)