Dialysis center tukuron sa Toledo City hospital
CEBU, Philippines — Nagtinguha ang kagamhanan sa dakbayan sa Toledo pagtukod og dialysis center sa Toledo City Hospital nunot niining mga pasyente nga nagkinahanglan niini tungod sa ilang sakit ilabi na sa mga may deperensya na sa ilang kidneys.
Ang tumong sa siyudad mao ang pagtabang sa mga pasyente nga taga Toledo aron dili na sila kinahanglan pang mobiyahe sa dakbayan sa Sugbo aron magpa- dialysis kada semana.
Sa nakalabay nga regular session sa konseho sa Toledo giaprobahan ang resolusyon nga giduso ni Konsehal Merly Abad, ang chairman sa committee on hospital administration sa pagratipikar sa kasabutan tali sa usa ka pribadong kompaniya alang sa katukuran sa naasoy nga pasilidad. Ang mga pasyente nga magpa-dialysis sa mga tambalanan sa dakbayan sa Sugbo mogasto og P5 mil kada sesyon, apan kon duna nay dialysis center sa Toledo gibanabana nga P2 mil ngadto P3 mil na lang ang ilang magasto. (BANAT NEWS)
- Latest
