Biktima ni Belleza niatras

CEBU, Philippines - Dili na interesado mopadayon sa iyang kiha ang 19-anyos nga local performer nga iyang gipasaka batok kang Noven Belleza, grand winner sa Tawag ng Tanghalan.

Niadtong Martes, ang biktima inabagan sa iyang abogado nga si Atty. Janice Lape, niduso sa korte og affidavit of desistance ug niawhag sa korte nga ibasura na ang kasong rape nga iyang gipasaka.

“After my sober and soul searching assessment and analysis of this case, I have realized that I have reached the point that I am no longer interested in pursuing the case due to inordinately adverse effects it brought to me and my family,” ang affidavit of desistance nag-ingon. Niadtong Hulyo 19, gipasaka sa korte ang kasong rape by sexual assault batok kang Belleza human makakita og igong basehan ang piskalya sa pasangil sa 19-anyos nga babaye.

Matud sa babaye nga nahitabo ang paglugos kaniya ni Belleza niadtong Hulyo 15 sud sa condominium nga giestaran niini para sa konsiyerto sa komedyanteng si Vice Ganda. Ang biktima ug ang akusado managkaila sa maong noontime show ug nagkauban sa kompetisyon kaniadto.

Si Atty. Leilani Villarino, legal counsel ni Belleza nagdumili sa pagluwat og pamahayag bahin sa pag-atras sa biktima sa iyang kaso.

Apan matud niya magpaabot ra sila sa aksyon sa korte sa maong desistance. Si Belleza gikatakda untang basahan sa iyang kaso karong Septiyembre 11. (BANAT NEWS)