Carillo di na makabalik sa public office

CEBU, Philippines - Kanhi konsehal sa Cebu City Gerardo Carillo dili na makakupot og public office. Kini human ang Office of the Ombudsman-Visayas nakakita kaniya nga sad-an tungod sa serious dishonesty.

Gawas nga dili na siya makakupot og public office, gibawi usab ang tanan niyang retirement benefits. Kahinumduman nga gipasakaan og kasong administratiba ni Administrative Aide III Michael Abellana ang konsehal diha sa Office of the Ombudsman human siya gimandoan ni Carillo  pagtrabaho isip kusinero sa kan-anan nga iya sa karelasyon sa konsehal.

Si Abellana kawani sa city hall ug nadestino kini sa opisina kaniadto ni Carillo sa dihang konsehal pa kini sa siyudad.

Matud pa ni Abellana nga una pa siya paadtuon didto sa Baryo Grille Restaurant pasuwaton una siya sa attendance sa city hall alas 5 sa kaadlawon  dayon pabalikon sa City Hall sa alas 11 a.m. aron mo- timeout.

Ang maong sistema giingong nagsugod sa Hulyo 2013 ngadto na sa Disyembre 2014.

Sa iyang counter-affidavit, si Carillo mihimakak nga ang pagtrabaho ni Abellana sa maong restaurant naka-interrupt sa iyang working hours. Matod niya ang Baryo Grille mangabli lang alas- 8 sa gabii hangtud sa alas- 6 sa buntag.

Apan base sa nakuha nga impormasyon sa Ombudsman gikan sa nga kawani sa maong kan-anan , 24 oras nga abli ang maong kan-anan kada adlaw.

Matod sa mga saksi nga nakita nila si Abellana nagtrabaho sa maong kan-anan kada buntag. Si Carillo dihang gikuhaan sa iyang habig miingon nga wala pa siya makadawat og kopya sa desisyon. (BANAT NEWS)