VP sa NORSU gisuspenso sa Ombudsman Visayas
CEBU, Philippines - Ang bise presidente sa Negros Oriental State University (NORSU) gisuspenso sa Deputy Ombudsman for the Visayas sa kasong simple neglect of duty.
Si Dr. Virginia Lacuesta gisuspenso sulod sa tulo ka buwan sa serbisyo nga walay madawat nga bayad.
Giingong si Deputy Ombudsman for the Visayas Paul Elmer Clemente miaproba sa rekomendasyon sa Graft Investigation and Prosecutor Officer human nasuta nga adunay igong ebidensiya batok sa giingong kalapasan ni Lacuesta.
Ang Field Investigation Office (FIO) sa Office of the Ombudsman-Visayas mipasaka og kasong administratiba batok kang Lacuesta tungod sa giingong kalapasan niining nahimo nga misconduct/conduct prejudicial to the best interest of the service/neglect of duty.
Giingong nasuta sa FIO nga dunay mga accountable officers sa NORSU lakip na niini si Lacuesta kinsa dunay unliquidated cash advances.
Giingong si Lacuesta nakadawat og public funds nga mikabat tanan sa P242,264.00 gikan sa tuig 2008 hangtud sa tuig 2009 ug ang maong pundo wala ma-liquidate.
Sa iyang counter-affidavit, si Lacuesta miangkon nga nadawat niya ang maong pundo ug na-liquidate na niya kini niadtong tuig 2015.
Nasuta sa FIO nga si Lacuesta nakalapas sa Section 5.1.3 sa Commission on Audit (COA) Circular No. 97-002 nga nagkanayon nga ang cash advance alang sa mga opisyal nga nag-travel sulod lang sa Pilipinas kinahanglang ma-liquidate kini sulod sa 30 ka adlaw gikan sa iyang pagbalik sa biyahe.
Ang Section 5.8 sa samang circular nagkanayon nga ang tanang cash advances kinahanglang ma-liquidate matag kataposan sa tuig ug ang Secion 89 sa Presidential Decree No. 1445 nagkanayon nga ang cash advance kinahanglang i-report ug i-liquidate gyud kini kon ma-served na ang purpose niini.
Wala palabya ang kasong administratiba batok ni Lacuesta tungod kay misumitir kini sa dokumento sa iyang liquidation lapas na sa deadline diin miabot pa ngadto sa sobra sa lima ka tuig. (BANAT NEWS)
- Latest
