Polis gikagubtan, nagdala’g armas, walay ID

CEBU, Philippines - Nitumaw ang tensiyon kagahapon sa hapon tungod sa usa ka lalaki nga nagdala og armas ug nagpailang polis dihang gisita sa sakop sa Barangay Intelligence Network (BIN) sa V-hire terminal sa Barangay Kamagayan, Dakbayan sa Sugbo.

Si Kagawad Tony Avila nibutyag sa Banat News nga ang maong tawo nga nailhan lang sa apelyido nga “Tinoy” usa gyud ka polis nga nadestino sa Talamban Police Station.

Matud ni Avila nga adunay buhaton nga inspection sa nahisgutang terminal aron masiguradong walay mga dautang tawo nga mouban sa mga pasahero sa V-hire.

Ang sakop sa BIN nga si Christopher Richie Vargas ang nisita sa maong polis kon nganong duna kini dalang armas sulod sa itom nga sling bag. Ang maong lalaki kinsa nisakay og V-hire paingon sa Moalboal adunay kauban.

Giingong ang maong tawo nisumbalik og pangutana kang Vargas kon opisyal ba kini kay nangutana man ngadto kaniya kon usa ba siya ka polis.

Giingong ang maong armadong tawo nipaila nga polis nga nadestino sa Pari-an Police Station apan dihang gipangitaan og ID, giingong wala kini makapakita og ID.

Ang mga opisyal sa Barangay Kamagayan nitawag sa Mobile Patrol Group ug giingong ang maong mga polis maoy nikunpirma nga usa gyud ka polis ang maong lalaki ug nadestino sa Talamban Police Station.

Wala makakuha sa kumpletong pangalan sa maong polis ang mga opisyal sa Kamagayan lakip na ang ranggo niini. Sa gihimong pakisusi sa Banat News, nasuta nga adunay “PO2 Charlito Tinoy” nga nadestino sa Talamban Police Station matud ni PO2 Alex Cubelo kinsa maoy duty desk officer kagahapon.

Nunot niini, si Konsehal Dave Tumulak, Deputy Mayor for Police Matters nagkanayon nga si Tinoy ug usa ka kauban niini kinsa iyang nahibaw-an nga usa usab diay ka polis, i-report niya karong adlawa ngadto sa Police Regional Office-7 aron sila mapatawag ug mapaubos sa imbestigasyon.

Matud ni Tumulak nga dili angayan nga ang usa ka polis o opisyal nga magdala og armas, walay mapakitang ID o ubang dokumento ilabi na nga niining panahona adunay mga pagpanghulga sa terorismo.

Nanawagan kini sa mga polis o opisyal nga magdala og armas nga magdala usab sa ilang ID ug mga dokumento sa ilang armas aron dili sila matahapan nga mga dautang tawo. Dugang niya nga ang mga polis o opisyal mao unta ang unang mosubay sa balaod dili kay mao ang unang molapas sa balaod. (BANAT NEWS)