CPDRC may mga kontrabando na sab

CEBU, Philippines - Mga kontrabando nasakmit sa gipahigayong greyhound operation kagahapon sa Provincial Public Safety Company (PPSC) ug Provincial Intelligence Branch (PIB) diha sa Cebu Provincial Detention and Rehabilitation Center (CPDRC).

Base sa report sa TV Patrol Central Visayas ang kapolisan nakaembargo  og mga cellphones, mobile wi-fi, lap tops, DVD players, mga buhing hayop sama sa pati ug isda ug drug paraphernalia gikan sa 29 ka selda.

Gawas pa niini, ang mga polis nakaembargo usab og listahan sa cash remittance nga miabot ngadto sa P70 mil gikan sa kanhi polis nga si PO2 Antonio Aguisanda kinsa napriso tungod sa pagkalambigit niya sa ginadiling drugas.

Ang mga polis nakasakmit usab og aluminum foil nga gamiton sa pagsuyop og shabu gikan sa selda sa high profile nga drug personality nga si Alvaro Alvaro alyas “Barok.”

Lakip usab sa mga naembargo sa mga polis gikan sa mga selda ang mga hait nga hinagiban.

Bisan og kanunay nga nagpahigayon og greyhound ang kapolisan ug gihigpitan ang pagpatuman sa mga patakaran diha sa CPDRC padayon gihapon ang palusot sa mga kontrabando.

Sayo pa, si Gobernador Hilario Davide, III niadtong buwan sa Mayo niining tuiga gipatawag sa congressional inquiry kabahin sa paghitak sa drugas sa CPDRC ug pagpahubo sa mga priso atol sa gipahigayong greyhound operations niadtong buwan sa Pebrero niining tuiga.

Giingong ang pagpahubo sa inmates usa sa mga standard procedure atol sa operasyon kini alang sa safety sa mga jailer ug priso.

Ang pagpahubo sa mga priso atol sa greyhound pagsiguro kini nga ang priso walay gisuksok nga mga kontrabando sama sa hinagiban nga posibleng gamiton nila sa pag-atake sa jailers ug mga operatiba. (BANAT NEWS)