Patay’ng lawas sa mga marino nakit-an na

CEBU, Philippines – Nakit-an na sa mga diver sa navy ang mga patay’ng lawas sa mga nawala nga marino nga sakay sa USS Fitzgerald human kini nagkabangga sa container ship sa kadagatan sa Yokosuka, Japan.

Sa taho sa philstar.com, ang mga diver nakasulod sa mga dapit nga nangaguba kon diin nila nakit-an ang na-missing nga mga seaman.

Ang maong mga patay’ng lawas, gidala usab dayon sa Naval Hospital Yokosuka aron adto sila ilhon matud pa sa gipagawas nga statement sa Navy. Nasayran nga pito ka marino ang nawala apan matud ni Yoko Kato, ang spokeswoman sa US Navy sa Yokosuka, dili ang tanang pito maoy nakit-an apan wala pa gibutyag niini kon pila ang ilang narekober.

Matud sa opisyales sa coast guard sa Japan nga nagpadayon ang ilang sea and air search duol sa nahitaboan sa panagbangga sa duha ka barko.

Gibutyag usab sa Navy nga kasamtangan nilang gipahibawo ang mga pamilya sa mga biktima ug hatagan nila sa mga gikinahanglan.

Ang mga pangalan sa mga marino ipagawas kon matapos na nila og pahibawo ang mga hingtungdang pamilya.

Padayon pang gisusi kon nganong nagkabangga ang duha ka barko nga nakaingon sa pagkaangol, pagkawala ug pagkamatay sa pipila ka marino. (BANAT NEWS)