Lingkuranan problema sa mga tunghaan

CEBU, Philippines - Nag-unang suliran ang kakuwang sa mga lingkuranan sa gatusan ka tinun-an sa mga publikong tunghaan sa mga barangay sa isla sa Olango, Dakbayan sa Lapu-Lapu.

Kini ang nasuta ni City Schools Division Superintendent Marilyn Andales atol sa pakisusi kagahapon.

Naglakip sa ilang gisusi ang mga buwag nga isla nga barangay sa Pangan-an ug Caubian diin adunay high school ug elementarya.

Susamang suliran ang nakita sa Barangay Santa Rosa ug Tingo.

Ang dakbayan gilangkuban sa 30 ka barangay diin 11 niini nahimutang sa isla sa Olango ug buwag nga gagmay nga isla sa Caubian ug Pangan-an.

Si Mayor Paz Radaza nipadayag sa paghatag og gahin nga pundo alang sa kasulbaran sa maong problema.

Samtang kapin sa 2,000 ka tinun-an sa Tayud Elementary School sa Lungsod sa Consolacion ang nakadawat og mga school supplies gikan sa Kapitolyo sa unang adlaw sa pagbukas sa klase niadtong Lunes.

Kini naglangkub sa lapis, ruler, writing pad, crayon, notebook ug plastic envelopes.

Ang nahisgutang eskwelahan sa nilabay’ng tuig adunay 2,920 ka tinun-an gikan sa kinder ngadto sa Grade 6.

Sa gipahigayong enrolment niining tuiga sukad sa Hunyo 5, 2017 niabot na sa 3,000 ang gidaghanon sa mga estudyante ug giingong nagpadayon pa sila og panawat og mga estudyante.

Gawas sa Tayud Elementary School, ang Kapitolyo manghatag sab og school supplies sa ubang publikong eskwelahan sa probinsiya.

Ang Provincial School Board (PSB) nigahin og P19 milyones alang sa budget sa school supplies ug P4.4 milyones alang sa school bags.

Matud ni Bokal Christopher Baricuatro, chairman sa committee on education sa hunta probinsiyal, nga sobra sa 474,000 ka tinun-an ang target nilang hatagan og mga school supplies.

Gipasabot ni Baricuatro nga kinahanglang makakuha sila og tukmang gidaghanon sa mga estudyante nga mahatagan og school supplies. (BANAT NEWS)