Piyesta sa Mandaue hapsay, malinawon

CEBU, Philippines - Gipahibawo sa kapolisan sa Dakbayan sa Mandaue nga walay fiesta-related crimes nga nahitabo sukad sa pagsugod sa mga kalihukan.

Matud ni Police Chief Inspector Mercy Villaro, tigpamaba sa Mandaue City Police Office, nga wala sila nilugak sa gipatuman nga seguridad kauban sa militar ug mga sakop sa Regional Public Safety Batallion.

Nagtinabangay sab ang 200 ka traffic enforcers sa Traffic Enforcement Agency of Mandaue (TEAM) sa paghapsay sa dagan sa mga sakyanan atol sa kapistahan, matud sa operation chief nga si Glenn Antigua.

Matud ni Marie Regis sa command center nga ang mga traffic enforcer giabagan sab sa nagkadaiyang volunteer groups sa dakbayan ug uban pa.

Samtang gisaulog ni Bishop Julito Cortes sa Dumaguete City ang pontifical mass sa kapistahan sa Señyor San Jose sa Dakbayan sa Mandaue.

Atol sa iyang wali, gipahimug-atan ni Cortes ang kamahinungdanon sa padre de pamilya nga maoy mohatag og bili sa pagkahiusa sa pamilya.

Matud ni Cortes nga ang pamilya nga magmaampoon magkahiusa kanunay. Rowena D. Capistrano ug Romeo T. Limpangog (BANAT NEWS)