Iyang matuod nga bokasyon

CEBU, Philippines - Malisud ug mabulukon ang dalan nga iyang gisubay paingon sa iyang nahimutangan karon. Nagdako siya sa kiliran sa iyang ina-ina, hangtud nga gikuha siya sa iyang matuod nga inahan niadtong grade six na siya ug gidala sa Mindanao gikan sa Camarines Norte.Dinhi magsugod ang istorya sa kinabuhi ni Roland Navarez Bolso, kinsa nahimong pari, nitalikod sa iyang bokasyon ug nagminyo.

Una niini, duha ka tuig ang nilabay human siya gikuha sa iyang tinuod nga inahan, nisunod ang ilang amahan ug subling natibuok ang ilang pamilya, kauban sa tulo niya ka mga igsuon nga anak sa gikapuyo sa iyang inahan.

Pagkagradwar ni Roland sa elementarya nitrabaho siya sa usa ka hardware apan naundang human siya gipugos sa iyahang inahan nga mosulod sa kumbinto didto sa Our Lady of Miraculous Medal Parish sa South Cotabato. Kontra gusto ang pagsanong niya sa maong kagustuhan sa iyang inahan sanglit buot niyang manarbaho na lang. Apan nakapasar siya sa entrance examination sa Notredame ug nalakip pa gyud sa pilot section. Sa kumbento siya gipapuyo.

“Kumbinto ug eskwelahan lang ka. Ang socialization nimo isip bata kay wala na. Feeling nako inferior ko kay financially wala ko kay private school man to,” hinumdom pa niya.

Dihang nakatapos sa high school, laraw ni Roland nga musulod pagka-military apan nakapasar siya exam sa seminary nga iyang gikuha sa dayon na niyang graduate. Apan naproblema na sab siya gumikan kay wala’y musuporta niya sa iyang hingpit na gayud nga pagsulod sa seminary. Hinuon, girekomenda siya sa usa ka parokya ngadto sa usa ka doctor nga maoy niabaga sa iyang pagkuha og kursong Philosophy sa Notredame of Marvel University.  Apan usa ka semester lang kini nagsuporta niya tungod kay nalugi ang negosyo niini. Sa ikaduhang higayon niduol siya pag-usab sa iyahang kaila nga parokyano ug tuod man nahatagan siya og bag-ong sponsor. Kini na maoy napahuman niya sa iyang pagkuha og nahisgutang kurso.

Paghuman ni Roland sa kursong Philosopy, kinahanglan siya mopadayon sa kursong Theology aron hingpit nga mahimong pari. Niadto siya sa Xavier University sa Davao ug nikuha og exam ug nakapasar siya. Didto na siya nagpuyo sa Xavier seminary human nadawat. Dili na mogasto ang iyahang sponsor sa pagtungha og Theology maong niduol na sab siya sa laing parokyano ug nangayo siya’g tabang ug tuod man gidala siya sa usa ka doctor ug maoy nagpaeskwela niya sulod sa lima ka tuig. Nigradwar si Roland sa Theology sa tuig 1995 ug naordinahan pagkapari sa tuig 1996.Grabeng kalipay ang gibati sa iyahang inahan nga nakahuman gyud siya pagkapari bisan sa ilahang sitwasyon.

Gipaambit ni Roland nga naengganyo siya’ng magpari gumikan sa buotan kaayo nga parish priest sa ilahang parokya. Pinangga matod pa siya sa maong pari kay brayt siya ug responsabli.

Pagsulay

Nindot matod pa ang kinabuhi sa usa ka pari apan nagkaproblema lang siya sa dihang nagkasumpaki sila sa ilang parish priest hinungdan nga nitalikod siya sa maong bokasyon human sa upat ka tuig. Apan ang mas bug-at gayud nga rason mao nga nahigugma siya sa babaye nga kanunay niyang kauban kun magmisa siya sa barangay.

Gidala niya ang iyang hinigugma pauli sa ila diin negatibo ang reaksyon sa iyang pamilya sa sitwasyon, gawas lang sa iyang amahan nga mao ray bugtong nakasabot.

“Didto nako na-appreciate si papa nga wala’y gieskwelahan pero pag-abot niya sa balay kay open arms gihapon niya ug gidawat ko sa balay,” paglab-as pa niya.

Ang pamilya sab sa iyang hinigugma human nasayod sa nahitabo, nisalikway sa nahisgutan, hinungdan nga gipas-an niya ang responsibilidad ug nagpakasal sila.

Nagpatabang si Roland sa iyang higala didto sa Manila, nga maoy nagpasulod niya og trabaho sa Indiana Aerospace University sa Lapu-Lapu City. Nadawat siya isip guidance counselor ug maestro. Gikan sa kaulohan gikuha niya iyahang asawa sa Davao ug sa Lapu-Lapu na sila nanimuyo niadtong tuig 2000 pinaagi sa gamay’ng lawak nga ilang giabangan. Kuwang gyud ang sweldo ni Roland busa nibalhin sila og mas barato nga lawak nga nahimutang sa usa ka squatter’s area ug nagkantidad og P800 ang bulan.

Niining mga higayona, magdamgo pa siya matag karon ug unya nga nagmisa siya, maghilak siya ug mamat-an sab niya iyang asawa nga maghilak tungod sa ilang sitwasyon.

Nangita og trabaho iyang asawa ug nadawat isip tindera. Wala magdugay, nagsabak ang iyang asawa. Ni-resign si Roland sa una niyang trabaho ug nibalhin sa Southwestern University PHINMA. Nibalhin sila pagpuyo duol sa eskwelahan aron wala na siya’y gasto sa plitehan. Niarang-arang ilahang sitwasyon niadtong panahona. Nagasahan sila og upat ka mga anak.

Pagtukod og negosyo

Una niyang gitukod nga negosyo mao ang water refilling station diin gipalit niya kini sa iyang amigo sa Aglipayan Church human siya nibalhin sa maong relihiyon. Didto na siya nagmisa kay matod pa gimingaw na gyud siya niini. Lima ka tuig siya’ng nagpari sa Aglipayan Church apan niundang siya kay idestino naman siya og laing parokya, ug mabiyaan niya ang iyang trabaho.

Laing negosyo nga iyang gitukod mao ang sikat nga kan-anan atbang sa tunghaan nga iyang gialagaran. Nakuha niya kining maong pwesto, human niundang ang unang nag-abang niini. Pagkaonan ang iyahang gitukod nga negosyo kay duol man sa eskwelahan ang pwesto. Pagkadungog niya nga paabangan ang tupad sa ilang pwesto, dali usab nila kining gikuha. Bakeshop ang iyang gibuksan tupad sa iyang kan-anan.

Human sa iyang naagian, nakakutlo og bulawanong pagtulun-an si Roland.

“Ako man gud dili man gyud ko mogive-up easily---kun makaya nako, kayanon nako. Of course you have to sacrifice, you have to gamble”, nagkanayon siya sa Banat News Tingusbawan.

“When you engage in a business,that is a risk. If you are willing to gamble dapat kaya nimo. Never give up,” panapos pa niya.  (BANAT NEWS)