Abusadong drayber sa City hall taktakon

CEBU, Philippines - Taktakon sa ilang trabaho sa Cebu City Hall ang mga drayber sa mga sakyanan sa dakbayan nga masakpang moabuso pinaagi sa dili pagtuman sa balaud sa trapiko.

Kini ang kamanduan ni Mayor Tomas Osmeña human siya nakadawat og hulagway gikan sa publiko nga adunay drayber og L300 nga sakyanan sa City Hall nga mohimo og left turn sa dapit nga wala itugot.

Ang gihimo sa maong drayber nakamugna og grabeng kahasol sa ubang mga motorista mao nga usa ka netizen ni-upload sa hulagway sa social media ug nakita kini ni Osmeña.

Matud ni Osmeña nga ang iyang kamanduan mao nga dili pasayloon ang mga drayber nga moabuso kay bisan gani ang iyang drayber dili siya mosugot nga moabuso sa balaud sa tukmang pagmaneho.

Ang lakang ni Osmeña gisuportahan sa hepe sa General Services Office (GSO) nga si Ronald Malacora, ingon man ni Konsehal Philip Zafra nga maoy presidente sa Association of Barangay Councils (ABC) ug kaalyado sa Team Rama.

Matud ni Malacora nga gipasidan-an gyud nila ang mga drayber sa City Hall nga dili moabuso ug kinahanglan sila nga magsilbi nga sumbanan sa ubang motorista.

Si Zafra niawhag sa kaubanan niya nga mga kapitan sa barangay nga mag-istrikto sab sa mga drayber nga giswelduhan sa barangay aron mapuo na ang mga abusado. (BANAT NEWS)