Scholarship accreditation ipasusi
CEBU, Philippines - Ipasusi sa Cebu City Scholarship Committee ang accreditation sa mga eskwelahan sa scholarship program sa siyudad.
Kini ang gibutyag ni Konsehal Joy Augustus Young, sakop sa Local School Board, aron mahibaw-an kung ang tunghaan angay pa ba ilakip sa accredited schools o dili.
Matud ni Young nga ang kanhi administrasyon walay gitunol nga records mahitungod niini hinungdan nga mobalik na sab sila sa sinugdanan.
Gitug-an ni Young nga ang committee nakakuha og impormasyon nga matud pa dunay mga tunghaan nga nagkuwang og mga kagamitan.
Dunay uban nga ang library dili kompleto og libro ug kung may libro dili sab magamit sa kurso nga gikuha sa mga tinun-an.
Kini maoy usa sa sutaon kung ang tunghaan angayan pa ba modawat og scholars sa siyudad.
Samtang gipahibawo ni Young nga nagpabilin ang accreditation sa Asian College of Technology bisan sa kaso nga giatubang sa tag-iya niini nga si Kongresista Rodrigo Abellanosa gumikan sa scholarship program sa siyudad. (BANAT NEWS)
- Latest
