TINAGSIP: 2 babaye sikop sa buy-bust

CEBU, Philippines - Nadakpan ang duha ka babaye sa buy-bust operation sa City Intelligence Branch ug City Drug Enforcement Unit sa Dakbayan sa Lapu-Lapu kinsa nasakmitan og tulo ka medium-size nga shabu.

Ang nadakpan giila nga sila si Angela Cabalhug Dungog alyas Jela, 19, taga Purok Beauty in the Sky, Barangay Babag, ug Marie Guc-ong Berdon, 20, nagpuyo gihapon sa maong dapit.

Street kids nihuman sa FSTP

Hingpit na nga natapos sa 21 ka street kids sa Subangdaku, Dakbayan sa Mandaue ang drug recovery program pinaagi sa Farmer Scientists Training Program (FSTP).

Gitudloan ang mga libud-suroy nga mga bata sa pagpananum nga magamit nila nga magsilbing panginabuhi sa panahon nga mohingkod na ang ilang panuigon.

Sikop sa akto

Duha ang nadakpan sa managlahing buy-bust operation sa Dakbayan sa Bogo niadtong Lunes sa gabii human nasakpan sa akto nga namaligya og ginadiling drugas.

Ang mga nadakpan mao sila si Marti Lubon Lepon, 23, taga Barangay Gairan, kinsa nakuhaan og tulo ka gagmay’ng pakete sa shabu, ug si Cipriano Verallo Jr., 31, taga barangay Sambag, kinsa nakuhaan og tulo ka gagmay’ng pakete.

Matud ni SPO1 Jim Susvilla nga nisurender na sa una ang duha apan nibalik sa ilegal nga negosyo. - Raziel Sumayang

16-anyos sikop sa buy-bust

Gisikop ang 16-anyos nga lalaki ug duha niya ka kauban atol sa buy-bust operation sa Babag 2, Dakbayan sa Lapu-Lapu niadtong Martes sa kadlawon.

Ang duha ka hamtong giila nga sila si Kevin Jumao-as alyas Nonoy, 29, ug Amoren Ravanes, 33, pulos molupyo sa maong barangay, kinsa nasakmitan og tulo ka medium ug 22 ka gagmay’ng pakete sa shabu.

Ang menor de edad ang gitugyan ngadto sa Department of Social Welfare and Development samtang ang duha ang gibalhug sa Lapu-Lapu City detention cell. - Hazel Secop

Upat ka trak nga basura nahipos sa baybayon sa SRP

Upat ka dumptrucks ang napuno sa basura nga gikolekta sa mga membro sa Department of Public Services (DPS), sa gipahigayun nga coastal clean-up drive sa South Road Property (SRP) niadtong Martes.

Matud pa ni John Paul Gelasque, DPS assistant head nga niabot og 100 ka street cleaners ang nangolekta sa mga basura sa coastal area sa SRP nga dul-an duha ka kilometros ang gitas-on.

Matud niya wala nila giplano ang gipahigayon sa coastal clean-up kay mibisita lamang sila sa lugar ug nakita ang daghang nagkatag nga basura sa coastal area ug didto na dayun nag-awhag ang mga street cleaners.

"Grabe ni kahugaw ganina kay wa pa gani ta nahuman... nakatulo nata ka truck. Hugaw jud ang sitwasyon mao na gi-deploy nato atong mga street cleaners para maka-general clean-up ta karon kay di man siya madala kung gamay ra ang tao (nga manglimpyo)," sigun ni Gelasque.

Giangkon usab niya nga lahi ang kahimtang sa coastal area tungod kay 10-20 ra ka DPS personnel ang anaa matag buntag aron sa pagmentenar sa kalimpyo kadagatan sa SRP.

Sigun usab sa DPS Foreman Sulpicio Zerda Jr. "Abnormal ni siya (nga panghitabo). Fifteen times more garbage ni siya compared atong nanglabay’ng adlaw.... karon ra ni kay hangin-hangin unya taob ba mao na nga nibaga ang basura, " matud niya.

Matud ni Gelasque nga ang mga nakolektang basura ilabay ngadto sa transfer station sa Inayawan.

Giawhag usab niya ang publiko nga mahimong responsable sa paglabay sa ilang basura, ilabi na ang mga plastic aron malikayan ang pagbara sa mga kanal ug mapunta kini sa kadagatan.

Sa pagkakaron ang regular nga garbage collection sa DPS balik na  sa 10 ngadto sa 15 ka mga personnel nga manglimpyo sa maong lugar. Zeny Tapuyao, Darlene Teves (BANAT NEWS)