Napildi sa sugal, naghikog patay

CEBU, Philippines - Naghikog patay ang 18 anyos nga lalaki niadtong Lunes sa udto sa may Barangay Binabag sa Dakbayan sa Bogo human kini mapildi sa buwang.

Nakit-ang nagbitay sulod sa iyang kwarto ang biktima nga si Jay Alimpos Dablos, 18 anyos lumad nga taga Brgy Antipolo sa Lungsod sa Medellin ug nagtrabaho isip katabang sa dapit nahitabuan.

Nasayran nga niadtong Lunes human madawat sa biktima ang iyang sweldo, niadto kini sa buwangan aron manugal apan napildi kini.

Matud ni SPO1 Alexis Camilo Villacrucis sa Bogo City Police Station nga nahurot og kapildi sa buwangan ang usa ka buwan nga sweldo ni Dablos ug anaa pa kini utang nga usa ka libo sa iyang kontra.

Dugang sa polis nga gimaymayan ang biktima sa iyang amo nga dili kadto buhaton pag-usab. Giingong dali kining misaka sa iyang kwarto.

Dihang maniudto na, gitawag kini apan wala mitubag, ila na lang kining nakit-an nga nagbitay. Daling gidala sa tambalanan ang biktima apan gideklarar na kining dead-on-arrival. Raziel Sumayang (BANAT NEWS)