Lola, apo napaig

CEBU, Philippines - Duha ang patay sa sunog nga nahitabo sa Sitio Kapayas sa Barangay Canjulao sa Dakbayan sa Lapu-Lapu alas 2:17 kagahapon sa hapon nga miugdaw og 16 ka mga panimalay.

Si Senior Fire Officer One Hadji Samonte nga maoy fire investigator sa Lapu-Lapu City District miila sa namatay nga mao si Auria Jumao-as, 80 , ug apo niini nga Jane Jumao-as, 14.

Matud pa ni Samonte nga na-trap ang duha sa duha ka andana nga panimalay nga ginama sa light materials nga gipanag-iya sa anak niini nga si Edna Jumao-as nga wala niadtong higayona atol sa maong hitabo.

Dugang pa ni Samonte nga naglisod na sa paglihok ang apohan tungod sa iyang edad ug ang apo niini nga PWD  naglisod usab sa paglihok hinungdan nga silang duha naapil og kasunog.

Matud ni Samonte ang kalayo dali kaayo nga mitapon ngadto sa silingan nga mga panimalay nga pulos usab ginama og gay. Nakontrolar paglabay sa walo ka minutos.

Mohimo pa sila og dugang imbestigasyon sanglit dili pa nila matataw ang hinungdan sa kalit nga pag-ulbo sa sunog ug ang pagbanabana sa danyos niini.

Si Canjulao Barangay Kapitan Nestor Paypa nga nahinabi sa Banat News miingon nga  temporaryo nilang ipahimutang sa tulunghaan ang mga pamilya nga biktima sa sunog.

Matud pa niya nga mohatag sila og hinabang ngadto sa mga biktima sama sa ilang pagkaon, mga sapot ug uban pa.

Ang kagamhanan sa maong dakbayan pinaagi sa City Social Welfare  (CSW) naghimo na usab og pakisusi  aron mopadala og mga ready to eat nga pagkaon ngadto sa mga biktima.

Base sa taho sa Lapu-Lapu City Fire District nga ang maong sunog sa Canjulao maoy ikaduhang alarma nianang          adlawa.

Ang unang alarma nahitabo alas 8:51 sa buntag  diha sa Barangay Pajo nga miugdaw usab sa kongkretong  panimalay nga gipanag-iya ni Glenn Abad.

Si Senior Fire Officer 2 Climaco Salisid nga maoy fire field investigator sa Lapu-Lapu  City Fire Department nagkanayon nga hungaw nga tangke sa Liquefied Petroleum Gas (LPG) maoy hinungdan sa maong sunog.

Gibanabana ni Salisid nga P100 mil ang danyos niini ug wala’y naangol o kinabuhing nakalas sa maong hitabo. Romeo T. Limpangog ug Rowena Capistrano (BANAT NEWS)