Binhi ipanghatag sa mga mag-uuma

CEBU, Philippines - Ang Provincial Agriculture Office (PAO) mipasalig nga dunay igong mga binhi sa mais ug giandam kini nga ipanghatag ngadto sa mga mag-uuma kun gikinahanglan.

Ang hepe sa PAO nga si Roldan Saragena, nagkanayon nga kun mograbe gyud ang kainit ug madaut ang mga tanom, dunay igong binhi nga ilang pundo nga mahatag ngadto sa mga mag-uuma.

Matud ni Saragena nga karon normal kini nga season diin matag summer ang pagpangandam sa mga mag-uuma sa ilang umahan. Panahon sa summer mao ang tingsabod sa mga mag-uuma og mga organic fertilizer sa ilang umahan.

Sa ikatulong semana sa buwan sa Mayo maoy “first cropping season” o pagpananom sa mga mag-uuma. Apan gilauman nga karong umaabot buwan sa Mayo mograbe ang kainit tungod sa El Niño.

Matud usab ni Saragena nga kun mograbe ang kainit sa buwan sa Mayo, dako og posibilidad nga madaut ang mga bag-ong gitanom. Gawas sa pasalig ni Saragena nga dunay igong mga binhi silang gipundo, giawhag usab niya ang tanang mga mag-uuma nga moparehistro sa Agri-Fisheries Program sa Kapitolyo aron kung madaut ang ilang pananom sa ilang umahan mabayaran sila niini sa Philippine Crop Insurance Corporation.

Ang maong pagparehistro sa nahisgutang programa sa Kapitolyo wala’y bayad. Ang Kapitolyo maoy mobayad sa premium ngadto sa PCIC ug ang buhaton lang sa mga mag-uuma mao ang pagduol sa agriculture office sa ilang lungsod ug siyudad aron mo-fill-up sa form. (BANAT NEWS)