Caravan, job fairs sa Adlaw sa Pamuo

CEBU, Philippines - Subay sa kasaulogan sa adlaw sa pamuo kagahapong adlawa, nagkalain-laing kalihukan ang giandam sa mga Local Government Unit alang sa ilang mga konstituwente sama sa pagpahigayon og job fairs ug uban pang katuyoan nga makatabang sa mga nangitag trabaho.

Ang Cebu City Government mipahigayon sa ilang local and overseas job fair sa Cebu City Sports Complex diin miabot sa gawas ang linya sa mga tawong nagparehistro kay gustong makakita og trabaho. Gani dili lang mga batan-on ang nangita og trabaho kay midagsa sab bisan ang mga edaran na.

Matud sa pangulo sa Department of Manpower Development and Placement (DMDP) Fidel Magno nga 60 ka local employers ang nisanong sa maong job fair nga nagtanyag og kapin sa 4 mil ka job vacancies.

 Sa overseas employment, kapin sa 6 mil ang bakanteng trabaho diin sagad sa mga gipangita mao ang skilled workers, trabaho alang sa hotels ug uban pa.

 Gihulagway ni Magno nga ang mga midagsa sa job fair ug mi-apply ilabi na sa lokal, daku ang posibilidad nga sila madawat on the spot.

 Nasayran nga ang DMDP gi-require sa Department of Labor and Employment (DOLE) nga 20 porsiyento sa mga mi-apply sa job fair ang madawat sa trabaho.

 Awhag ni Magno sa mga aplikante nga gustong manimpalad sa gawas sa nasud nga magbinantayon ug dili dayon motuo aron dili mabiktima sa illegal recruiters.

Gidagsa sab sa mga aplikante ang gipahigayong local job fair ug one stop shop sa Public Employment Service Office (PESO) sa Kapitolyo.

Si Julius Chua ang labor and employment officer sa Kapitolyo mibutyag nga adunay 2,764 ka job vacancies sa 30 ka kompaniya nga misalmot sa maong kalihukan. Kini naglakip sa mga restaurant, fast food chain, department store ug factory.

Dugang ni Chua nga ang makabenepisyo sa maong job fair dili lang taga probinsiya lakip na usab ang mga taga laing lugar. Iyang gibutyag nga adunay aplikante nga ma-hired on the spot kun kwalipikado sa iyang giaplayan nga trabaho. 

Ang Provincial Health Office miapil usab diin kun adunay mga aplikante nga adunay gipamati sa lawas, mahimong makapa-checkup nga libre.

Nagkahiusa ang mga employer ug employee lakip na ang upat ka LGU nga mao ang Dakbayan sa Lapu-Lapu, Mandaue, Cebu ug Talisay diin gihimo ang kalihukan sa sulod sa compound sa Sisters of Mary Girls Town.

Karong tuiga ang Talisay maoy host sa Tripartite Industrial Peace and Council Activity diin adunay mga gihimo nga medical mission, agri-fair, libreng hilot, diskuwento caravan ug one-stop shop.

Tunga sa adlaw lang ang maong programa human nakat-on ang mga opisyal diin mamiya na ang mga motambong inig human sa paniudto.

Si DOLE-7 Director Elias Cayanong, nipahibalo nga 13, 900 ka trabaho ang gitanyag kagahapon sa upat ka gipahigayong job fair diin 4, 400 niini overseas ug 9,500 ang lokal. Decemay P. Padilla, Brenda D. Batuto, Gabriel C. Bonjoc, ug Romeo T. Limpangog (BANAT NEWS)