BPPO: Mga bandido di kakuha’g suporta sa Bohol

CEBU, Philippines - Gisalikway sa Muslim community sa Bohol ang mga bandidong Abu Sayyaf maong maglisod og pangayo og tabang ang mga nahabiling bandido, matud pa ni Bohol Provincial Director Sr. Supt. Felipe R. Natividad.

Samtang giklaro ni Natividad nga hangtod karun, wala pa ma-verify ang taho nga aduna nay nangabot nga mga laing miyembro sa Abu Sayyaf sa Bohol tungod kay giatangan silang daan.

Kahinumdoman nga adunay migawas nga report nga adunay mag-uuma nga nisumbong sa kapulisan nga aduna kunoy lalaki nga gidudahang bandido nga nangayo kaniya og pagkaon ug tsinelas ug nangutana pa kung asa ang agianan paingon sa siyudad sa Tagbilaran. “Bini-verify natin kasi marami nang information. Marami nang tumutulong. Ang pag-verify ay hindi naman madali. It will take us time,” pasabot pang Natividad. Usa pa sa padayon pang gi-verify sa mga kapulisan mao ang taho nga nanakay og bus ang mga bandido padung Tagbilaran, apan matud pang  Natividad nga wa pa usab kini makompirmar.

Gipakatap na sa Bohol ilabi na sa mga bus ang mga hulagway sa mga nahabiling mga bandido apil niini ang menor de edad nga giingong alyas Asis nga gisusi pa kun mao ba kini si Saad nga giingong anak og sultan.

Kahinumdoman nga atol sa pagkasikop sa grupo ni Supt. Ma. Cristina Nobleza ug bana niining bomb expert nga si Reener Lou Dungon, sila nangangkong ila untang i-rescue ang usa ka alyas Saad nga kauban sa mga bandido nga nasamdan sa engkwentro, matud pa usa ka “royalty” sa Mindanao ang pamilya niini.

Base sa inisyal nga imbestigasyon, 11 ka mga Abu Sayyaf lakip na ang gituohang lider sa maong grupo nga si Joselito Melloria ang nisud sa Bohol ug tulo na lang kanila ang nahabiling buhi ug nagtago-tago sa Clarin, Bohol ug gipasalig ni Natividad nga di na sila makagawas. Camille Pateres  (BANAT NEWS)