Mga coops mag-rally ugma

CEBU, Philippines - Ipahigayon ugmang adlawa ang lapad nga rally sa mga kooperatiba sa nasud batok sa tinguhang paglibkas sa tax exemption.

Sa Sugbo, gibana-bana nga moabot sa 10,000 ka mga opisyal ug mga sakop sa kooperatiba ang mopahigayon sa pagmartsa gikan sa Fuente Osmeña Rotunda hangtud sa atubangan sa Kapitolyo.

Matud ni Reynaldo Gandionco, chairman sa core group nga magpasiugda sa rally sa Sugbo, nga ang kalihukan kabahin kini sa nasudnong pagpakita sa pwersa sa mga kooperatiba batok sa tinguha sa Kongreso nga pahamtangan og buhis ang mga kooperatiba.

Si Kongresista Rodrigo Abellanosa sa Dakbayan sa Sugbo atol sa general assembly sa Guadalupe Multi-Purpose Coop, una na nga nipadayag sa pagbabag sa balaudnon.

Si Presidential Assistant for the Visayas Michael Lloyd Dino atol sa general assembly sa Cebu Newscoop nipadayag usab sa iyang suporta sa mga kooperatiba. (BANAT NEWS)