“Fixers” sa LTFRB-7 gisikop

CEBU, Philippines - Gituohang fixer nga transport operator ug empleyado sa gobiyerno, gisikop sa joint team sa National Bureau of Investigation ug Land Transportation Franchising and Regulatory Board sa usa ka entrapment human kini gireklamo nga nangilkil og P300 mil aron sa pag-release sa prangkisa niini.

Gireklamo ni Luz Estopa mao sila si Jesse Tabanao, usa ka transport operator ug Emil Membrillas, assistant information officer sa LTFRB-7.

Matud pa ni Estopa sa iyang affidavit nga gipangayuan siya og P300 mil apan ang P150 mil lang ang iyang nahatag bugti sa paghatag kaniya og prangkisa nga pila ka buwan na lang ang nilabay sukad niya gihatag ang maong kantidad, wala gihapon ang prangkisa.

Tungod sa kadugay, gitawgan niini si Tabanao aron ipauli ang P150 mil ug didto nahimo ang entrapment.

Ang buhatan ni Tabanao anaa ra sab mahimutang tapad sa building sa LTFRB-7.

Niadtong Disyembre sa miaging tuig, gisikop ang van ni Estopa sa LTFRB-7 enforcers nga gipanguluhan ni Membrillas kay kolorum kini apan gibuhian human nibayad siya og P50 mil isip franchise reservation fee.

Matud ni LTFRB-7 regional director Ahmed Cuizon, P520 ra ang bayranan sa prangkisa apan tungod sa moratorium, walay prangkisa sa van ang maluwatan.

Dugang niini nga sukad 2003 hangtud karon wala na nag-isyu ang LTFRB og franchise ngadto sa mga van for hire, taxi, jeepney, mini buses ug buses kay adunay moratorium.

Gisuspenso na usab ni Cuizon si Membrillas sugod kagahapon.

Gipasabot niya nga angay mahunong na ang maong klase sa pagpangilad ug iyang gi-warningan kadtong mga tawo nga magpadayon sa maong binuhatan, gukdon gyud sila sa balaud.

“Only LTFRB, the court of franchise has the right to issue franchise. No private office has the right to process franchise application. Besides, there is no such thing as franchise application or franchise reservation,” matud ni Cuizon.

Si NBI-7 agent Arnel Pura nagkanayon nga anaa sa ilang kustodiya ang duha ka dinakpan diin pasakaan og kasong administratiba si Membrillas samtang kasong estafa ug violation sa Anti-Red Tape Law si Tabanao. (BANAT NEWS)