TINAGSIP: Trapik sa bridge

CEBU, Philippines - Grabeng huot sa trapiko ang nasinati sa mga motorista sa Marcelo Fernan Bridge kagahapon sa buntag gumikan sa panagbangga sa tulo ka sakyanan ug pagka-abiriya sa  usa ka 10-wheeler truck.

Martes sa gabii una nga nasinati ang kahuot sa mga sakyanan sa maong taytayan nga nakaapektar sa kadalanan sa Dakbayan sa Mandaue hinungdan nga daghang pasahero ang nangatanggong.  

Nasungag, usa patay

Usa ang patay ug lima ang naangol human ang traysikol nga ilang giluwanan ang kalit lang nasungag sa dump truck sa Iba, Basak, Dakbayan sa Lapu-Lapu ala una pasado sa niaging kadlawon.

Ang namatay mao si Edo Saregan Saumay, 36, drayber sa traysikol nga taga Kagudoy, Pajac sa maong dakbayan samtang ang mga naangol mao sila si Miguel Mercado, 77, taga Camella Homes, Pajac; Benz Manlangit, 28, taga Kagudoy; Michelle Tan Wells, 25, taga Kagudoy; Carl Anthony Uy, 23, taga Deca Homes Subdivision sa Pajac ug John Loy Amores, 21, taga Calubihan, Pajac.

Gikan sa merkado publiko sa dakbayan ang traysikol dihang nasungag sa David Justin dump truck nga gimaneho ni Rene Barola Garles, 51, taga Cotcot, Liloan. (BANAT NEWS)