Mga hayop sa Cebu Zoo ibalhin sa Amlan

CEBU, Philippines - Gipaabot nga karong Mayo 15, i-transport na paingon sa Lungsod sa Amlan sa Negros Oriental ang pipila ka mga hayop nga anaa karon sa Cebu Zoo, kini ang gipahibawo sa pangulo sa Department of Veterinary Medicine and Fisheries (DVMF) Dr. Alice Utlang nga maoy nagdumala sa nahisgutang zoo. Aduna nay transport permit ug suwat gikan sa Amlan nga ang tentative date sa pag-transport sa kahayupan karon nang Mayo 15, 2017.

Matud ni Dr. Utlang nga ang kahayupan ma-accommodate sa zoo sa Amlan kini human mibisita ug mihimo’g pakisusi ang mga staff sa Amlan Zoo.

 Nasayran nga muabot sa 77 ka hayupan ang ibalhin ngadto sa Amlan. Samtang aduna’y mga kahayupan nga gibuhian na ug ang uban nga wala’y insaktong dokumento, gikustodiya sa Department of Environment and Natural Resources.

 Sigon ni Utlang nga bukas gihapon ang Cebu Zoo ug matud pa bisan og wala na’y kahayupan nga mahabilin, mahimo ra gihapon kining adtuan sa mga gustong mobisita sa dapit.

 Kahinumduman nga ang Cebu Zoo usa lang sa mga property sa siyudad nga gilakip ni Mayor Tomas Osmeña sa land swap deal sa 93-1 tali sa kagamhanan sa Siyudad sa Sugbo ug sa Cebu Provincial Government. Darlene Teves (BANAT NEWS)