Lima ka priso nakaeskapo

CEBU, Philippines - Lima ka mga priso sa Compostela Police Station ang mipuga sa prisohan kagahapon sa kaadlawon.

Matud pa ni Police Chief Inspector Romeo Caacoy, ang kasamtangan nga hepe sa Compostela, nagpahigayon og pag-ihap ang out-going desk officer ug ang jailer nga si Senior Police Officer 2 Jaime Maroliña, sa dihang nabantayan niini nga kulang na og lima ka tawo ang mga priso.

Sumala pa ni Caacoy, ang mga nakaeskapo mao silang Giovanni Tapayan, 40, taga Barangay Mulao; Joel Cuyos, 33, taga Barangay Guiwanon; Joseph Pio Mahinay, 33;  pulos dunay kaso sa drugas ug silang Rubin Catipay, 19, kasong Anti-Fencing Law ug Nelson "Watie" Agbay, nga dunay kaso nga illegal numbers game kon R.A 9287.

Sa pagsusi nila, giputol na diay ang duha ka round bars sa likod nga bahin sa prisohan ug didto nilusot ang mga niikyas.

Gibutyag ni Caacoy, walo lang ang ilang kapasidad sa maong prisohan apan karon 38 ka buok ang sud sa maong prisohan.

Gitug-an ni Caacoy, ila usa gipaubos sa imbestigasyon kung gabas ba ang gigamit ug kinsa usab ang nagpalusot niini.

Si Caacoy, nitug-an nga padayon gihapon ilang hot pursuit operations batok sa mga nakaeskapo.

Apan kagahapon sa hapon, nadakpan og balik sa kapolisan si Catipay  samtang si Cuyos boluntaryong nibalik sa presinto nga gikuyogan sa iyang asawa .

Ang OIC Chief sa Provincial Operations and Plan Branch Police Chief Inspector Gerard Ace Pelare nitug-an nga aduna na silay composite team karon nga gipangulohan ni Police Supt.Mina Domingo ang Deputy Provincial Director for Operations kuyog ang Povincial Public Safety Company, ug Intelligence ang nitabang sa Compostela Police Station pagpangita sa mga nakaeskapo.

Tungod niini, imbestigahon usab ang hepe ug ang jailer nianang orasa.

Nagtuo si Pelare nga atoa pa sa kabukiran ang mga nangeskapo.

Si CPPO Director Eric Noble, nimando na sa tanang CPPO staff officer isip district supervisor aron susihon ang kahimtang sa tanang mga prisohan sa kalungsoran.

Kini tungod kay sayod kining naghuot na kining tanan karon tungod sa gipangusgang kampanya kontra drugas ug tungod kay di na modawat og dugang priso ang Cebu Provincial Detention and Rehabilitation Center. (BANAT NEWS)