P100 ra ang gikolekta sa siyudad

CEBU, Philippines - Mihatag og katin-awan si Cebu City Mayor Tomas Osmeña sa taho nga matud pa P170 ang gipaningil sa siyudad sa mga drayber sa V-hire nga anaa magtapok sa terminal sa Brgy. Kamagayan.

Una nang gitubag sa mayor nga ang siyudad maoy nag-operate sa terminal ug iyang gihimakak nga P170 ang ilang gikolekta kay P100 ra gyud ang gikolekta sa City Treasurer’s Office sa matag V-hire nga mogawas sa terminal.

Gihulagway sa mayor nga ang P100 nga gikolekta, deretso gyud sa panudlanan sa siyudad ug gani makita kini sa record. Hinoon, kadtong mga V-hire nga magpundo og overnight sa terminal, mobayad og P20. Sigon usab ni Osmeña nga ang grupo sa V-Hire Driver’s Federation, giingong mangolekta og P30 isip bayad sa tawo nga nagmentinar sa terminal. Apan iyang giklaro nga wala’y kalabutan ang siyudad niini. (BANAT NEWS)