TINAGSIP: Aser sa merkado

CEBU, Philippines - Laing babaye nga may pagkalakin-on ang linihukan nga aser ang nasikop sa Tabunok Public Market sa Dakbayan sa Talisay niadtong Martes sa buntag.

Si Annie Cariazo, 24, taga Lagtang St., Tabunok, ang naatlan sa mga sakop sa Provincial Intelligence Branch (PIB) sa Cebu Provincial Police Office (CPPO) ug sa Talisay City Police Station nga nagbantay sa stall sa ilegal nga swertres. Ang dinakpan nakuhaan og libro nga adunay markang Galaxy, carbon paper, ballpen, cellphone nga gigamit isip calculator ug kwarta nga P455. Gabriel C. Bonjoc

Dalan sirad-an

Sirad-an ang karsada nga buyon sa St. Joseph Parish sa Dakbayan sa Talisay atol sa Biyernes Santo sugod sa alas 2 sa hapon hangtud mahuman ang misa sa maong adlaw.

Kini aron luwas ang bagang duot sa katawhan nga manimba ug mamalandong sa maong adlaw sama sa gihimo sa nangaging katuigan. Tan-awon pa sa mga tinugyanan sa trapiko sa siyudad kung tugutan ba nila ang laing pagpasira nga gihangyo sa kadagkuan sa simbahan atol sa sugat sa Domingo sa kadlawon. Gabriel C. Bonjoc

Niutong nalumos

Nalumos ang 14-anyos nga lalaki sa ilang paghugoy-hugoy sa mga classmates atol sa farewell party sa usa ka resort sa Dakbayan sa Talisay. Ang nakalas mao si Jake Rein Rebojo, taga Ward 4, Minglanilla, human nisalmot sa patas-anay sa utong.

Nabantayan na lang sa lifeguard si Rebojo nga nilutaw human sa pipila ka gutlo hinungdan nga kini gitabang ug gidala sa tambalanan diin gideklarar nga patay na. Rowena D. Capistrano

Help desks

Nagbutang na ang Cebu Coast Guard District og mga help desks sa nagkalainlaing pantalan sa Sugbo isip pangandam sa Semana Santa. Matud ni Cebu Coast Guard Station Commander Dionelitt Ampil nga magbutang sab sila og mga tarpaulin alang sa Oplan Ligtas Biyahe: Semana Santa 2017.

Si Ahmed Cuizon, regional director sa Land Transportation Franchising and Regulatory Board-7, sa iyang bahin nagkanayon nga mopahigayon sila og random inspeksiyon sa mga bus terminals karong semanaha aron pagseguro nga luwas ang mga pasahero. Mitchelle L. Palaubsanon

Bars susihon

Gitagalan hangtud sa Abril 20 ang mga balay kalingawan sa pagtuman sa mga rekisitos lakip na sa ilang permit ilabi na sa pagdili sa mga minor de edad.

Matud ni Konsehal Dave Tumulak, chairman sa committee on public order and safety, nga mohimo sila og inspeksiyon kuyog sa ubang ahensiya kung gituman ba ang ordinansa ingon man sanitary ug building code. Kini human sila nakadawat og reklamo gikan sa usa ka inahan nga ang iyang 14-anyos nga anak nisulod og usa ka bar ug nahubog. Decemay P. Padilla (BANAT NEWS)