Tour guiding business ipa-regulate

CEBU, Philippines - Giawhag sa Provincial Board ang mga lokal nga kagamhanan nga moumol og ordinansa alang sa pag-regulate sa tour guiding activities sa ilang lugar.

Kinahanglang isubay sa accreditation standards sa Department of Tourism (DOT) diin tumong niini mao ang pag-promote ug pagprotektar sa legitimate tour guiding industry.

Gipalabang sa PB ang sugyot nga giduso ni Bise Gobernador Agnes Magpale ug nilang Bokal Jerome Christian Librando ug Edsel  Galeos.

Nabantayan sa mga opisyal sa Kapitolyo nga dunay mga ilegal o walay lisensiya nga mga tour guides ang nag-operate sa mga lugar sa probinsiya.

Kini nakaapekto sa mga legitimate tour guiding business ug nakaapekto usab sa gihimong promotion sa local tourism sa Sugbo.

Ang DOT walay “hold” sa mga ilegal nga tour guides tungod kay ang maong ahensiya walay police power.

Ang mga lokal nga kagamhanan dunay police powers ug sila ang angayang mopasiugda ug mo-implementar sa regulatory measures lakip niini ang licensing sa tour guiding business ug istriktong pagsul-ob og ID nga gi-isyu sa DOT sa mga tour guides nga nag-operate sa lugar. (BANAT NEWS)