BOPK na maoy mayoriya

CEBU, Philippines - Nahuyang na ang Team Rama diha sa Cebu City Council kay dili na kini mao ang majority human nga si Konsehal Jerry Guardo mibiya sa ilang grupo ug mibalhin sa Bando Osmeña Pundok Kauswagan.

Sa 17 ka sakop sa City Council, siyam na ang mga konsehal nga kaalyado ni Mayor Tomas Osmeña ug walo lang ang sa Team Rama. Si Guardo maoy ikatulo nga konsehal gikan sa Team Rama nga mibiya ug siya nitapon sa BOPK, una niini silang Konsehal Nendell Hanz Abella ug Dave Tumulak nibiya usab sa Team Rama kay nag-independente apan sila gihatagan og posisyon ni Osmeña isip deputy mayor for education (Abella) ug deputy mayor for police matters si Tumulak.

Matud ni Guardo nga nasagmuyo kaayo siya nga gisuspenso og tulo ka buwan sa Ombudsman tungod sa kapakyas niya pagduso og financial report ngadto sa Commission on Audit diha nga kapitan pa siya kaniadto sa Barangay Sambag 1.

Si Guardo miingon nga ang mipuli kaniyang kapitan nga si Lemar Alcover, gipasagdan ra sa kadagkoan sa Team Rama nga mipasaka kaniya’g kaso bisan og kauban ra sila’g partido. Mahinangpong gidawat si Guardo ni Osmeña ilabi na nga nabantayan sa mayor nga si Guardo motrabaho gyud sa mga gimbuhaton nga makaayo sa katawhan bisan og siya diha pa sa Team Rama.

Ang mayor nakapanglantaw nga paspas na ang paglambo sa dakbayan karon nga nakuha na sa BOPK ang majority diha sa City Council kay wala na may mobabag sa mga programa sa executive department.

Sila si Vice Mayor Edgardo Labella ug Konsehal Raymond Garcia nga parehong alyado sa Team Rama, nanghinaut nga molambo ang politikanhong ambisyon ni Guardo karon nga bag-o na siya og pamilya.

Si kanhi mayor Michael Rama wala pa mohatag og reaksyon sa pagbiya ni Guardo sa ilang grupo. - /EIM) (BANAT NEWS)