Gipangdemolis sa Mantuyong makabalik ra

CEBU, Philippines - Gihangop sa 33 ka pamilya nga naapektuhan sa demolisyon sa Sitio Ihawan sa Brgy Mantuyong, ang gipadayag ni Mandaue City Mayor Luigi Quisumbing nga makabalik sila sa luna nga ilang gipuy-an human unya sa reblocking.

Kahinumduman nga natigayon gyud ang demolisyon niadtong Miyerkules bisan sa pagsupak sa mga residente. Gihinabi hinoon sila ni Mayor Quisumbing ug gisaaran nga ipahimutang una sa compound sa Cebu International Convention Center ug makabalik ra sila sa ilang gipuy-an human sa himoong reblocking sa lugar.

Nasayran nga ang luna nilang gipuy-an, gipanag-iya sa kagamhanan sa dakbayan human gidonar ni anhing mayor Alfredo Ouano ngadto sa Federation of Mandaue City Urban Poor Inc. (FEDMACUPI) diin ang mga apektadong pamilya kabahin sa mga beneficiary.

Ang tumong sa reblocking nga gipatuman sa kagamhanan mao ang paglikay nga masubli pa ang mga nahitabong sunog sa dapit tungod kay maglisod ang mga fire truck sa kabomberohan. (BANAT NEWS)