Calumpang girelibohan isip jail warden

CEBU, Philippines - Nakurat si Mayor Tomas Osmeña dihang nasayod nga girelibuhan ang jail warden sa Cebu City Jail nga si JSupt. Jessie Calumpang.

Una niini, nasuta nga girelibuhan sa iyang katungdanan si Calumpang gumikan  aduna gihapo’y nakuha nga mga kontrabando sa city jail atol sa gipahigayong greyhound operation sa Philippine Drug Enforcement Agency (PDEA-7).

Bisan og wala gisalikway ni Osmeña ang posibilidad nga basin aduna’y nakapindot sulod sa prisohan kalabot sa operasyon, apan nalipay siya kay menus ra ang nakuhang kontrabando.

Tungod sa maong hitabo makig-istorya ang mayor kang Konsehal Dave Tumulak nga maoy deputy mayor for Police Matters kalabot sa nahitabo kang Calumpang.

Subay niini, si Konsehal Tumulak miingon nga nagkaistorya na sila ni Calumpang ug nasayran nga sa wala pa ang  operasyon sa PDEA, aduna na siya’y order ibalhin og laing buhatan.

Nunot niini, giklaro ni Tumulak nga wala’y kalambigitan sa nahitabong operasyon ang pagkarelibo ni Calumpang isip jail warden.

Wala pa hinoon masayod ang Konsehal kun kinsay mohulip kang Calumpang apan kini miingon nga iya kining pakigtagboan lakip na si Mayor Osmeña.

Sa laing bahin, ang PDEA-7 mirekomendar ngadto kang Gobernador Hilario Davide, III sa estriktong pag-implementar sa penalty batok sa mga masakpang magpalusot o maggunit og kontrabando sulod sa CPDRC.

Sa gisumitir nga report kabahin sa post operation sa PDEA sa milabay’ng semana, nasuta nga kinahanglan og policies alang sa pag-imposar sa estriktong penalty batok sa mga inmate, bisita ug CPDRC staff nga masakpang naghupot og cellphone. Matud sa PDEA nga ang pagpalusot og mobile phones makahatag og kahigayonan sa mga inmate sa ilegal nga transaction.

Ang PDEA misugyot sab sa pagpaubos og screening process ug periodic drug testing ang mga kawani sa provincial jail lakip usab ang surprise random drug test sa mga priso.

Ila sab girekomendar ang pag-isyu og commendation ngadto sa mga sakop nga miapil sa pagpangronda sa jail aron sila makabaton og high morale tungod sa pag-recognize sa ilang nahimo. (BANAT NEWS)