CCTV ordinance gipalabang sa Provincial Board

CEBU, Philippines - Gipalabang sa unang pagbasa sa Hunta Probinsiyal niadtong Lunes ang ordinansahon alang sa pagbutang og CCTV system sa publiko ug pribadong lugar sa probinsiya.

Si Bokal Edsel Galeos maoy mi-sponsor sa maong ordinansahon diin tumong niini ang public safety, pagprotekta sa kabtangan ug pagmentenar sa kahusay ug kalinaw. Tipik sa maong ordinansahon nga kinahanglang ang mga lokal nga kagamhanan mogama og mga pamaagi sa pagprotekta sa kinabuhi sa ilang konstituwente ug pauswagon ang siguridad aron usab maaghat ang mga negosyante nga mo-invest og puhonan sa lugar. Nalatid sab sa maong ordinansahon nga ang Kapitolyo mo-establisar og CCTV monitoring center ubos sa direct supervision sa gobernador ug Provincial Disaster Risk Reduction and Management Office.

Kun kini maaprobahan, ang makagama og unang kalapasan hatagan og “warning” ug pabayaron og P2 mil nga multa; sa ikaduhang kalapasan pagkapriso sulod sa usa ka tuig ug pabayaron og P5 mil nga multa o discretion sa korte; sa ikatulong kalapasan pagkapriso gihapon sulod sa usa ka tuig ug pabayaron usab og P5 mil nga multa o discretion usab sa korte. - /DILT) (BANAT NEWS)