Tommy wa nabalaka sa ‘black book’

CEBU, Philippines - Wala nabalaka si Cebu City Mayor Tomas Osmeña sa pamahayag sa kanhi mayor Michael Rama nga nalakip siya sa listahan ni Presidente Rodrigo Duterte sa mga politiko nga giingong drug protector.

Si Rama niingon nga angayang mangandan si Osmeña sanglit duna siyay impormasyon nga nadawat gikan sa kasaligang tinubdan nga nalakip ang pangan sa mayor sa black book ni Duterte.

Apan ang maong pamahayag ni Rama gipakagamay lang ni Osmeña kinsa niingon nga mao gihapon kini ang Rama nga kaniadto nanghinaut nga siya mamatay, masuspenso ug mapilde sa piniliay.

“Is this the same Michael Rama who keeps on saying I’m going to die, is this the same Michael Rama who said I’m going to be suspended, is this the same Michael Rama who said that he is winning the election protest, is this the same Michael Rama who is dreaming, all his reliable sources told him that he is going to win the election, right?” matud ni  Osmeña.

Gitataw ni Osmeña nga wala ra siya nabalaka niini sanglit kung unsa’y mahitabo iya kining dawaton.

Nagkanayon ang mayor nga mas nabalaka pa siya nga dunay mga kabatan-onan nga dili makatungha, mga urban poor nga dili makadawat og tambal ug basura nga dili makolekta sa siyudad.

Wala sab nahulga si Osmeña sa report nga matud pa daghan og giandam nga kaso si Rama batok kaniya. (BANAT NEWS)