MR ni Rupinta, 7 konsehal gibasura
CEBU, Philippines - Gibasura sa Ombudsman ang motion for reconsideration sa preventive suspension nga giduso ni Ermita, Cebu City Kapitan Felicisimo Rupinta ug pito ka konsehal.
Sa mando sa Ombudsman nga gipetsahan og Pebrero 2, 2017 ug pinirmahan ni Deputy Ombudsman for the Visayas Paul Elmer Clemente, kini nagkanayon nga walay kapasikaran ang mosyon sa mga opisyal.
Si Rupinta ug mga konsehal nga sila si Marky Rizaldy Miral, Antonieto Flores, Ryan Jay Rosas, Alio Tamundo, Domingo Ando, Maria Buanghug ug Wilbert Flores niduso og MR human sila gipaubos sa unom ka buwan nga preventive suspension.
Kini may kalabutan sa reklamo nga gipasaka sa Philippine Drug Enforcement Agency-7 sa giingong wala pagtabang sa mga opisyal sa usa ka anti-drug operation sa niaging tuig. Si Atty. Maria Corazon Naraja, tigpamaba sa Ombudsman-Visayas, nagkanayon nga ang preventive suspension dili silot apan paagi kini nga hapsay ang imbestigasyon.
Samtang gihangop ni Cebu City Mayor Tomas Osmeña ang pagbasura sa MR.
Matud ni Osmeña nga iyang nasayran nga ang Barangay Ermita hinay-hinay na nga naka-adjust sa sitwasyon ug giingong nahunong na sab ang illegal collections sa mga opisyal kinsa gipangsuspenso.
Sa iyang bahin, si Rupinta niingon nga wala pa nila nadawat ang maong kamanduan sa Ombudsman.
Ang ila na lang karon mao ang paghuwat kung husayon na ang ilang kaso. Le Phyllis F. Antojado ug Decemay P. Padilla (BANAT NEWS)
- Latest
