Tommy nabalaka na sa ATM skimming

CEBU, Philippines - Giangkon ni Cebu City Mayor Tomas Osmeña nga nabalaka siya sa nahitabo nga mas nidaghan ang nabiktima ATM skimming sa siyudad.

Matud sa mayor  ang banking industry sa siyudad walay gihimo sa pagprotehir sa kwarta nga gideposito sa ilang mga kliyente.

Niadtong Disyembre si Osmeña nabiktima sab sa ATM skimming diin nahibaw-an niya nga dunay nikobra sa iyang account.

Bag-ohay lang nabiktima mao ang mga kawani sa gobiyerno sama sa National Food Authority, Department of Interior and Local Government, Armed Forces of the Philippines, Philippine National Police         ug Population Commission.

Bisan pa man niini, si Osmeña walay plano nga ibalik sa manual ang pagpanghatag sa sweldo sa mga kawani sa City Hall gumikan sa kalangay unya.

Andam hinoon maminaw si Osmeña sa mga sugyot kung unsaon nga matabangan ang mga biktima sa ATM skimming ug aron mahatagan og solusyon ang maong suliran.

Samtang makig-alayon ang kapolisan sa opisyal sa Land Bank of the Philippines human nitumaw ang daghang biktima sa ATM skimming diin daghang polis ang biktima.

Matud ni Chief Supt. Noli Taliño, director sa Police Regional Office-7, nga “technical” kaayo ang maong problema.

Ang maong problema ang ipaabot sab ni Taliño sa Cebu Bankers Club.

Ang director sa Cebu City Police Office, Senior Supt. Joel Doria, niingon nga ila sab subayon ang ATM machines sa LBP sa Banilad diin daghang reklamo.

Gipasabot ni Doria nga kinahanglan nga subayon og maayo ang maong impormasyon basin og dunay sipyat lang sa transaksiyon sa usa ka ATM machine.

Ang first vice president sa LBP-Eastern and Central Visayas, Manny Jose Mari Infante, nitug-an sa mga tigbalita nga nihimo na sila og pagsubay sa maong impormasyon ilabi na sa Banilad branch.

Sa pagkakaron dili pa makompirmar ni Infante kung pila gyud ang nabiktima sa ATM skimming kay nagpadayon pa ang ilang pagsubay sa maong insidente. Decemay P. Padilla ug Jojo C. Ugdol (BANAT NEWS)