Kapitolyo magtukod og botika
CEBU, Philippines - Mopadagan ang Kapitolyo og botika alang sa mas barato nga tambal ug mapalambo ang serbisyo sa panglawas.
Ang Hunta Probinsiyal nihatag og pagtugot kang Gobernador Hilario Davide III ug Dr. Rene Catan, hepe sa Provincial Health Office (PHO), nga mo-apply og license to operate (LTO) og “Botica Sa Sugbo” sa Food and Drug Administration sa Department of Health.
Si Bokal Christopher Baricuatro ang nangamahan sa resolusyon nga naghatag sa maong katungod.
Matud ni Baricuatro nga tumong nila nga mapauswag ang paghatag og serbisyo sa panglawas ngadto sa mga Sugboanon pinaagi sa paghatag og kasegurohan sa barato, epektibo ug de kalidad nga tambal.
Dugang ni Baricuatro nga importante kaayo nga ang probinsiya mag-operate og kaugalingong botika.
Ang Kapitolyo ni-implementar sa medicine consignment ordinance aron maseguro nga ang 16 ka hospital sa probinsiya dili mahutdan og supply sa mga tambal.
Apan giingong tungod sa maong ordinansa, ang PHO nakasinati og kakuwang sa supply sa mga tambal tungod kay ang probinsiya nagapos lang sa usa ka supplier.
Si Catan niawhag sa budget committee sa pag-amendar sa nahisgutang ordinansa ug nisugyot nga ang probinsiya motukod og kaugalingong botika nga maoy mo-supply og mga tambal sa mga hospital sa probinsiya. (BANAT NEWS)
- Latest
