Kapolisan sa Talisay magpakaon og lugaw

CEBU, Philippines - Nidalit og lugaw ang kapolisan sa Siyudad sa Talisay ngadto sa kabarangayan aron makuha nila ang pagsalig sa katawhan ug sila motabang sa pagpakigbatok sa ginadiling drugas.

Si PO3 Christopher Cesa, Police Community Relation (PCR) sa kapolisan sa dakbayan, nibutyag nga mosuroy sila sa nagkalain-laing barangay aron mohimo og drug symposium sa mga residente ingon man paghatag og espirituhanong aspeto nga maoy labing importante sa usa ka tawo nga malikay sa bisyo.

Sila si Cesa, pinanguluhan sa ilang labaw nga si Supt. Emerson Dante ang giubanan ni Pastor Jonathan Acosta.

Asoy pa niya nga dili magmahay ang katawhan sa ilang pagpaminaw tungod kay gawas nga sila ma-edukar bahin sa epekto sa ginadiling drugas, mabusog pa ang ilang tiyan tungod kay giandaman sila sa init nga lugaw.

Usa sa nakita ni Cesa sa maong kalihukan mao ang pagkuha sa pagsalig sa katawhan diha kanila aron sila mokooperar sa ilang kampanya batok sa ilegal nga drugas ug sa mga tawo nga padayong nagpaluyo niini.

Iya sab silang lingawon sa iyang kanta bahin sa druga nga iyang ginama nga maoy nahimo sab nga kampiyon sa kompetisyon sa ilang rehiyonal nga buhatan. - /GMR) (BANAT NEWS)