“Waste to Energy” gitrabaho

CEBU, Philippines - Gitrabaho sa kagamhanan sa Siyudad sa Sugbo ang pagtukod og “waste to energy”  facility sa Inayawan Landfill aron pagsulbad sa problema sa garbage disposal.

Si Mayor Tomas Osmeña kinsa tua sa gawas sa nasud nag-post sa iyang official Facebook page nga bahin niini.

“I am spending my weekend studying a project I really want to bring to Cebu. The Philippines is the probably last population dense country in Asia to not implement waste-to-energy”, tipik sa post ni Osmeña. Nasayran nga ang maong matang sa pasilidad gipatuman na sa mga nasud nga Singapore ug Japan.

Kahinumduman nga nilarga niadtong Marso 6 si Osmeña uban sa iyang pamilya aron ubanan ang iyang igsoon nga si kanhi senador Serge Osmeña kinsa mipaubos og operasyon sa Singapore. Karong adlawa gipaabot nga mahibalik sila sa Sugbo.

Niadtong Nobiyembre 2016 ang mayor miingon ang city government adunay plano nga mobutang sa nahisgutang pasilidad. Gani si kanhi konsehal Nida Cabrera nga gitahasan sa pagtan-aw niini dihang gibuksan og balik ang landfill miingon nga adunay duha ka pribadong kompaniya ang mipresentar sa ilang proposal. Subay niini, ang Assist. Head sa Department of Public Services John Paul Gelasque miingon nga sila si Cabrera, DPS head Bob Cabarrubias ug Mayor Osmeña   nagplano sa maong proyekto. Dugang niini nga ang maong lakang kabahin sa ilang commitment sa Court of Appeals ug ang pundo sa maong teknolohiya, kuhaon sa approved budget sa rehabilitation karong tuiga nga mokantidad og P85 million. - /DILT) (BANAT NEWS)